МЫЙ ВӦЧИСНЫ ПАЛАЧЬЯС БОЛГАРИЯЫН
Таво арнас Болгарияса крестьяна лэптысьлісны асланыс правительство вылас, кӧсйисны шыбитны лёк озыр власьт, пуктыны крестьяна власьт, да вынныс эз судзсьы. Болгарияса белӧйяс (фашистъяс) вермисны крестьянаӧс да зэв ёна коньӧръясӧс мучитісны.
Со мыйяс сэні вӧчӧмаӧсь еджыдъясыд.
Фердинанд карын больничаас виӧмаӧсь (начкӧмаӧсь) став революционерсӧ. Найӧкӧд тшӧтш виӧмаӧсь кык дас вит арӧса
Сы бӧрын сэсся арестуйтӧмаӧсь да лыйлӧмаӧсь революционеръяслысь пиянсӧ — кызь кык мортӧс.
Власьтыс вӧлі шыблалӧма аэропланъяссянь (лэбалан машинаяссянь) кабалаяс, вӧлі шуӧма: «Коді пӧ бурӧн сетчас — нинӧм пӧ налы оз ло». Бӧрыннас сэсся унджыксӧ лыйлісны йӧз дырйи.
Ӧти капитан Василей Монев кутӧма 22 крестьянинӧс, кӧрталӧма ставнысӧ да ставнысӧ бытшйӧдлӧма шыӧн. Мӧдлаын лыйлӧмаӧсь 47 крестьянаӧс.
Майор Иванов сотӧма уна деревня, лыйлӧма да грабитӧма йӧзсӧ, уна нывбабаясӧс сильничайтӧма.
Бургас карын ӧти лунӧ вӧлі лыйлӧмаӧсь пулемётъясысь куимсё крестьянаӧс.
Уровӧн местаын вӧлі бурӧн сетчӧмаӧсь нёльсё революционер. Найӧс ставнысӧ лыйлӧмаӧсь да бытшйӧдлӧмаӧсь.
Ӧти квайтымын арӧса старикӧс Иван Парвановӧс ёна мучитӧмӧн виӧмаӧсь. Фашистъяс кутӧмаӧсь сійӧс, петкӧдӧмаӧсь площадь вылӧ, чукӧртӧмаӧсь сэтчӧ став йӧзсӧ деревнясьыс дай заводитӧмаӧсь мучитны: первой вундӧмаӧсь пельяссӧ, нырсӧ, кералӧмаӧсь кокъяссӧ да шыбитӧмаӧсь понъяслы. Сэсся кералӧмаӧсь кияссӧ, бӧрвылас орӧдӧмаӧсь юрсӧ. Став йӧзыс бӧрдӧмаӧсь. Палачыс (офицер) мучитігас тшӧктӧ вӧлӧм горзыны старикыслы: «Долой пӧ уджалысь йӧз власьт, мед пӧ олас озыръяслӧн власьт!..»
Громша грездын лыйлӧмаӧсь нелямын крестьянинӧс, весиг найӧ абу мыжа вӧлӧмаӧсь. Палачьясыс (еджыд офицеръяс) сувтӧдӧмаӧсь найӧс да кузя ногыс лыйлӧмаӧсь, — мед пӧ позьӧ вӧлі тӧдны, кымын пыр вермӧ пуля мунны.
Мектобец грездын палачьяс кутӧмаӧсь попӧс Ӧндрей Игнатовӧс, вӧчӧмаӧсь ӧшӧданін (виселича), вӧтлӧмаӧсь сэтчӧ деревнясьыс став йӧзсӧ видзӧдны джагӧдӧмсӧ. Ӧтик офицер кӧсйӧма сылы пеклясӧ юрас сюйны да повзьӧма. Попыд сэтчӧ и горӧдас: «Мый нӧ пӧ тэ, палачӧй, полан? Али пӧ тэнад эм на сӧвесьтыд?..» Сэсся бергӧдчас да озыръяслы шуас: «Ті пӧ, тиранъяс, локтӧмныд видзӧдны менсьым смертьӧс. Регыд воас тіянлы смерть!» Сэки попӧс джагӧдасны. Нёль лун сылӧн шойыс ӧшаліс сэні...
Кык учительӧс Железна грездысь Меладинӧс да Кунчевӧс кувтӧдзныс нӧйтӧмаӧсь да вундалӧмаӧсь. Палач Моневӧс бурӧдӧм вӧсна, мед сійӧ оз йӧзсӧ лыйлы, сетӧмаӧсь сылы нелямын мӧс.
Майор (офицер) Иванов локтӧма отрядӧн Лопушна грездӧ, чукӧртӧма сэтысь став йӧзсӧ да висьталӧма: «Меным пӧ тшӧктісны тіянӧс ставнытӧ лыйлыны да тіянлысь деревнятӧ сотны». Сэсся бӧръяс став йӧз пытшсьыс дас кык мортӧс да йӧз син водзас лыйліс. Уналысь овмӧссӧ сотас сы бӧрын.
Зэв ёна, весиг висьтавныс он вермы, мучитӧмаӧсь еджыдъяс уджалысь йӧзӧс Болгарияын!
Тадзи озыръяс кӧсйӧны повзьӧдны уджалысьясӧс, мед найӧ эз кыпӧдчыны озыр власьт вылӧ. Тадзи найӧ кӧсйӧны бырӧдны революционеръясӧс. Он бырӧд найӧс! Регыд озыръяслы воас пом!
