КОЛӦ ӦТУВТЧЫНЫ

Сизимӧд во нин сулалӧ тільсьысь-пессьысь йӧзлӧн Сӧвет власьт. Сизимӧд во ми мырсям, лӧсьӧдам бур оланног, а олӧмыс гӧль крестьянинлӧн зэв на ичӧта вежсис. Миян Коми муын эз вӧвны помещикъяс. Видз-му гӧль йӧзлӧн революция бӧрын ньӧти эз сод. Сӧвет власьт, ас гӧльлун вӧснаыс, немтор на эз вермы прамӧя сетны.

Ме юала став бур коми йӧзыслысь: вермас-ӧ миян гӧль крестьянин тадзи водзӧ овны? Быдӧн шуасны: оз. Кыдз нӧ миян гӧль йӧзыслысь колӧ олӧмсӧ вежны? Вежны позьӧ сӧмын сідз, кыдзи ставроссияса выставка вылын индісны. Колӧ гӧль йӧзлы ӧтувтчыны. Ӧтувтчӧмӧн этшаджык колӧ гӧран-кӧдзан кӧлуй, этшаджык колӧ вӧвъяс, ӧтувтчӧмӧн позяс удждысьны сельскокӧзяйственнӧй банкысь да ньӧбны мый колӧ.

Ӧтувтчыны колӧ ещӧ и со мый вӧсна: миян государствоыд зэв на гӧль, оз на сійӧ вермы быд мортлы, ӧтнаслы, сетны вӧлӧн да мӧскӧн, а ӧтувтчан кӧ — делӧыс лоӧ мӧд. Сэки крестьянин куим-нёль вылӧ позяс и судзӧдны вӧв, либӧ мӧс, либӧ плуг.

Гӧль йӧзлы колӧ та вӧсна думыштны прамӧя. Гӧль йӧз кӧ оз ӧтувтчыны — дыр на лоӧ копрасьны озыр йӧз водзын. Дыр на лоӧ собранньӧяс вылын вомтӧ топӧдӧмӧн пукавны да кывзыны озыръяслысь горалӧмсӧ.

Ӧтувтчӧй, гӧль йӧз, лӧсьӧдӧй аслыныд бур выль олӧм!

М. Торлопов.