КОМИ ЙӦЗЛЫСЬ ШОГ ПАЛЬӦДЫСЬ

Вывті жӧ нин гажтӧм коми йӧзлӧн олӧмыс! Гӧльлуныс коми мортӧс чужӧмсяньыс чорыд кабырас кабыртӧ. Муртса на тырас коми челядьлы квайт арӧс, найӧс гӧль бать-мамыс нуӧны нин му вылӧ пинёвтны — нянь кусӧк перйыны. Став гажлуныс комилӧн — удж. Сьӧкыд удж!..

Татшӧм лёк олӧмсӧ коми йӧзлы лӧсьӧдӧмаӧсь саръяс, попъяс, урадникъяс да мукӧд пӧлӧс озыр йӧз.

Коми йӧзлы эз сетлыны личыд олӧм, югыдлун (грамота). Коми йӧз няйт пытшкын да вӧр пытшкын ассьыс нэмсӧ коллявлісны. Позьӧ шуны: коми йӧз юр вылын Октябрса революцияӧдз (1917ʼ воӧдз) пемыд сьӧд кымӧр век шувъявліс.

Октябрса революция вайис и коми йӧзлы шонді югӧр. Садьмис коми йӧз. Шеныштіс сойяс, паськӧдіс бордъяс. Вежсис олӧм. Вӧля воис. Пуны мӧдіс удж. Коми гӧль йӧз пырӧны партияӧ, том йӧз — союз молодёжӧ. Воссялӧны театръяс, клубъяс, нардомъяс.

Мыччысисны коми гижысьяс, коми сьылысьяс, коми шог пальӧдысьяс.

Коми гажа олӧм вӧсна медся уна мырсис, ӧні мырсьӧ, Нёбдінса Виттор. Нёбдінса Витторӧс тӧдӧ быд морт. Сылысь сьыланкывъяссӧ, стихъяссӧ лыддьӧ гырысь и посни. Сылӧн коми ворсанторъясыс (пьесаяс) разалӧмаӧсь паськыд Коми му пасьтаыс. Ёна уна бур вӧчӧ комилы Нёбдінса Виттор! Радейтӧны Витторӧс коми йӧз. Не татшӧм йӧзыс кӧ, дыр на эськӧ комилы лои гажтӧг овны. Коми йӧз, лыддьӧй коми гижысьяслысь гижӧдсӧ! Коми гижысьяслӧн кывъяс медся чорыда пырасны юрад, коми сьылӧмӧн, коми кывйӧн медся на ӧдйӧ палялӧ шогыд! Мед унджык Коми муын лоӧны Нёбдінса Витторъясыс!

М. Торлопов.