КОМИ ЙӦЗӦС САДЬМӦДЫСЬ

Октябрса революция вежис быдӧнлысь олӧм, ставсӧ мӧдарӧ путкыляліс. Нимтӧмъясӧс нималіс, нартитӧмъясӧс мездаліс. Сэтшӧм йӧз, дерт, оз вермыны ӧти здукӧн пырысь-пыр садьмыны-ёнмыны, кок йылӧ сувтны. Налы колӧны отсасьысьяс, чуксасьысьяс, пальӧдысьяс, велӧдысьяс. Ми, коми войтыр, сэтшӧм жӧ нимтӧм йӧз вӧвлім войдӧр. Эз вӧв миян асланым гижысьяс. Сы вӧсна мед нин ёна миянӧс йӧз туйӧ эз пуктыны.

Ӧні ӧтилаын-мӧдлаын кывны кутісны чуксасьысьяс, сьылысьяс, ворсысьяс, коми войтырӧс сьӧд вӧр шӧрысь югыд эрд вылӧ петкӧдысьяс.

Коми йӧзӧс чуксалысьяс пытшкысь медгораа, медмеліа, медгажа кылӧ сьылӧм, ворсӧм, мойдӧм Нёбдінса Витторлӧн (В. Савин).

Вит во чӧж нин сійӧ Коми му пасьтала чуксасьӧ коми йӧзлы сьӧлӧманыс аслас гӧгӧрвоана сьыланкывъясӧн: «Сьӧлӧм сьылӧмнас», «Ичӧтдырся олӧмнас», «Меданас», «Тӧвся рытнас» (став коми йӧз олӧмнас — сьылӧмнас, бӧрдӧмнас, шогнас, гажнас), аслас ворсанъяснас: «Райнас», «Водзӧснас», «Вабергачнас», «Шонді петігӧн дзоридз косьмӧмнас», лыдтӧм‐тшӧттӧм гижӧднас. Коми му кузя — быд грездын, быд сиктын, быд школаын челядь дзольгӧны-сьылӧны, лыддьӧны Нёбдінса Витторлысь гижӧм, лӧсьӧдӧм. Коми ныв-зон быд рыт гажӧдчӧны сійӧ гижӧд серти. Уна том ичмонь шогсӧ пальӧдӧ коми рытъяс вылын, сэні Виттор кор серамнысӧ петкӧдлӧ, кор синванысӧ аслас сьыланкывъяснас, ворсаннас. Весиг пӧрысьяслы зэв муса Нёбдінса Витторлӧн коми сьыланкывъясыс, найӧ сэки казьтылӧны ассьыныс том олӧмнысӧ, том гажнысӧ.

Сьӧлӧмсянь бурсиам Нёбдінса Витторлы уна 5 во на овны, коми пармаӧс гажӧдны, босьтчӧдны. Мед уна во на водзӧ чуксасяс, коми войтырӧс гажӧдас, югыд паськыд эрд вылӧ петкӧдас! Кузь нэм, бур шуд Нёбдінса Витторлы!

Коми ань.