КЫДЗИ ВИТ ВО КОЛИ МЕНАМ ГИЖӦМЛЫ

Ме Сыктывкарӧ уджавны локті 1-й августын 1918 воын. Медводдза коми гижӧд менам — «Гӧрд звӧн» — петіс август 18-ӧд лунӧ (№ 18 газеты «Зырянская жизнь»). Сы бӧрын нӧшта на петаліс куим-ӧ-нёль. Сійӧ нӧ ставыс вӧлі артмӧма менам корсюрӧ (случайно). Прамӧясӧ коми гижӧмӧ ме кутчыси тайӧ лунъясӧ вит во сайын, кор менӧ Сыктывкарса коммунистъяс пуктісны газетын юралысьӧ (редакторӧ). Сэкисянь ме вӧлисти бурджыка кутчыси коми кывйӧн гижны. Сы кузя меным и лоӧ вит вося уджалӧмыс тайӧ лунъясӧ (рочӧн кӧ — юбилей). Менам пыр вӧлі дум (ӧні на эм) — гажӧдны, чуксавны важ шудтӧм олӧмсьыс коми вокъясӧс. Дерт, уджавны лои тайӧ вит вонад бура ёна. Уна эськӧ кӧсйи гижны да, пӧраыс эз вӧв — мукӧд пӧлӧс уджъясӧн вӧлі юрӧй тырӧма.