КЫДЗИ ОВМӦС КЫПӦДНЫ

Кутчысьӧй выль уджӧ!

Выставка вылӧ ветлысь крестьяналӧн агрономъяскӧд сёрни (агрономическӧй сӧвещанньӧ) помасис. Вежонӧн-джынйӧн найӧ арталісны, туй корсисны, кыдзи кыпӧдны овмӧс (кӧзяйство) коми крестьяналысь. Медуна сёрни вӧлі, кыдзи позьӧ Коми муын видз-му уджавны Выставка велӧдӧм серти.

Сэсся шуисны: коми крестьяналы овмӧс кыпӧдны позьӧ со кутшӧм ногӧн:

Бырӧдны боръяс, паськӧдны муяс. Отсавны мӧдлаӧ овмӧдчысьяслы (пуксьысьяслы, переселенечьяслы).

Эновтны ӧнія ногӧн му уджалӧм (ид-коськӧм-сю) — сійӧ дзикӧдз рӧзӧритас крестьянаӧс. Колӧ выль ногӧн уджавны, вӧдитны унджык пӧлӧс кӧдзаяс (турун кӧдзны, сёркни, мукӧдтор).

Кӧдзны колӧ тыр-бур весалӧм кӧйдысӧн, мед кӧдзаяс оз ёгӧссьы. Кӧйдыс вылӧ да боръяс (межаяс) бырӧдӧм вылӧ колӧ бурджыка (серьёзнӧя) видзӧдны уджалысьяслы.

Лӧсьӧдны быдлаӧ «сьӧд коськӧм» (черный пар). Колӧ пырысь‐пыр жӧ вундӧм бӧрын коськӧмтӧ гӧрны да сідзи (пинёвттӧг) кольны тӧвйыны. Тулыснас, кор муртса кутас вӧв лыбны му вылад, колӧ коськӧмтӧ пинёвтны.

Таво ёна няньяс да мукӧд кӧдзаяс жугӧдісны гагъяс. Колӧ чорыдджыка босьтчыны гагъяссӧ бырӧдны.

Омӧлик гӧр помысь оз ло ыджыд урожай. Колӧ быдлаӧ лӧсьӧдчыны плугъясӧн гӧрны.

Скӧт этша миян, куйӧд оз тырмы. Колӧ корсьны мукӧд пӧлӧс му вынсьӧданъяс (удобренньӧ). Ӧнісянь жӧ колӧ Совнархозлы кутчысьны перйыны фосфорит (Сыктыв вожын уна эм).

Медъёна колӧ скӧт миянлы йывмӧдны. Сійӧн видзьястӧ колӧ бурджыка уджавны, мед турун вӧлі тырмиг.

Мӧсъясӧс оз ков видзны видзьяс вылын. Найӧ йирсиганыс турунтӧ вужнас нетшкӧны, видзьяс тшыкӧны, турун бырӧ. Скӧт видзанінъяс колӧ лӧсьӧдны торъя весасъясӧ (расчисткаясӧ). Вӧрвывъясын миян турун некор оз овлы, нитш кындзи. Колӧ тулысын во кык-куим мысьт вӧрвывъяс гӧрны да кӧдзны шабді, зӧр; сэсся сы бӧрын сэтчӧ кӧдзны кутшӧмкӧ унавося турун. Быд тулысын колӧ вӧрвывъяс пинёвтны.

Пуктасъяс (огород) колӧ вӧдитны тшӧтш нянькӧд, му вылын.

Колӧ восьтавны сельскокӧзяйственнӧй кооперативъяс. Сы пыр ёна позьӧ кыпӧдны крестьяналы овмӧссӧ.

Сэсся колӧ вӧр жугӧдӧмысь видзчысьны. Вӧр миян — ыджыд овмӧс сетысь. Сӧвещанньӧ шуис: чорыда босьтчыны дзикӧдз дугӧдны тылаяс уджавны!

Со кутшӧм туйӧд колӧ мунны коми крестьяналы, мед регыдджык вермасны сьӧкыд олӧмысь петны. Дерт, оз кӧ асьныс босьтчыны агрономъяс висьталӧм серти уджавны — нинӧм оз лолы, овмӧс сэки миян оз кыпты!

Кутчысьӧй, коми крестьяна, выль ногӧн видз-му уджавны!