КОЛӦ ОТСАВНЫ

Коми йӧзлы колӧ коми коммунист, коми служак, коми сӧветскӧй уджалысь.

Сэтшӧм йӧзсӧ ми велӧдам партшколаын. Велӧдчысьыс сэні унджыкыс — гӧль йӧз пӧвстысь. Мукӧдыслӧн гортас весиг уджалысьыс абу кольӧма. Ӧні сэтшӧмъясыс вӧзйысьӧны гортаныс куйӧд кыскавны: «Лэдзӧй пӧ менӧ, менам пӧ гортса олӧмӧй киссьӧ!» А лэдзнысӧ оз позь. Лэдзан кӧ — сійӧ этша велалас, уна коляс, этша кутас тӧдны. Сійӧ лоӧ омӧль коми уджалысь, омӧль коми коммунист.

Мый нӧ колӧ керны, гортса олӧмыс кӧ киссьӧ и школасьыс лэдзлыныс оз позь? Колӧ сэтшӧм гӧль семьяыслы отсавны гортса йӧзыслы. Колӧ том йӧз чукӧръяслы (Р. К. С. М.) да коммунист чукӧръяслы вӧчавны субӧтникъяс дай куйӧдсӧ и петкӧдны; пес-турунсӧ вайны. Мӧда-мӧдлы отсалӧмысь лёк оз ло. Кымын ёна мӧдам ӧти-мӧдлы отсавны, сымын ӧдйӧ мӧдас бырны гӧль йӧз, сымын ставнымлы лоӧ кокньыдджык овны.

М. Торлопов.