МЫЙ ШУӦНЫ КРЕСТЬЯНА ШВЕЙЦАРИЯСА СУД ЙЫЛЫСЬ

Ми огӧ вунӧдӧй налысь судсӧ!

Слӧбӧдаса крестьяна кылӧмаӧсь асланыс рӧдня (шеф) пыр т. Воровскӧйӧс виысьясӧс судитӧм йылысь (Швейцарияса суд найӧс абу мыждӧма сыысь) да со мый шуӧмаӧсь колян субӧтаӧ:

«Татшӧм суднад ми, видз-му уджалысь йӧз, огӧ миритчӧй. Тадзи кӧ озыръяс судитӧны миянлысь бурджык вокъяснымӧс виалысьясӧс, асьныс регыдджык аддзасны помсӧ. Став уджалысь йӧзыс аддзасны налысь дорйӧмсӧ да ёнджыка сьӧлӧмныс ӧзъяс кось вылӧ буржуйяскӧд. Ми шуам: мед Сӧветса правительство Швейцариякӧд дугдас быдпӧлӧс сёрни нуӧмысь и тӧргуйтӧмысь. Ӧні озыръяс асьныс асьнысӧ прӧститӧны, кор вермасны вины бурджык мортӧс уджалысь йӧз пиысь. Но регыд ӧтувтчӧм уджалысь йӧз став озырсӧ сувтӧдасны асланыс суд водзӧ да судитасны найӧс став лёк вӧчӧм пондаыс».

Топыдджыка ӧтувтчам!

Вӧскресенньӧӧ Кӧдзвывса (карса) Комитет Взаимопомощилӧн вӧлі чукӧртчылӧм. Крестьяналы сэні висьталісны, кыдзи озыр Швейцарияса суд дорйис т. Воровскӧйӧс виысьясӧс. Крестьяна шуисны:

«Ми пӧ ещӧ ёнджыка топӧдчам (ӧтувтчам), мед регыдджык вермас лоны Ставмувывса революция. Смерть пӧ озыр палачьяслы»!