КЕР ЛЭДЗЫСЬЯС, ӦТУВТЧӦЙ!

Октябрса революция бӧрын Сӧветса Республика пасьтала кыптавлісны артельяс, союзъяс, коммунаяс. Миян войвывса йӧз, торъя нин Коми Обласьтса — нэмӧвӧйся кер лэдзысьяс — сідзи жӧ ӧтувтчылісны артельясӧ.

65 артельӧ вӧлі ӧтувтчӧма 6122 морт. Сійӧ артельясыс шусьылісны уездса, губерняса Комитетъясӧн. Сэки эськӧ найӧ и босьтчылісны нуӧдны став уджсӧ. Да сӧмын сьӧкыд, дзескыд воясыд торкисны. Лои кер лэдзысьяслы омӧля мынтысьӧмыд, сэсся таляліс трудгужналогнад кертӧ лэдзӧмыд. Сы вӧсна и бырлі став артельясыс.

Ӧні сэсся выль ногӧн олігад (новая экономическая политика) вӧр лэдзӧмыд Коми Обласьтын лои йӧз государство фирмаяс пыр: Северолес, Руссголландлес, Руссанглолес.

Найӧ 1922−1923 вояснад уджалысьясӧс медавлісны важ моз, быдӧнӧс торйӧн. Коми войтыр эз ӧтувтчыны, быдӧн торйӧн уськӧдчалісны нажӧтка бӧрсяыд, весиг эз донъясьны фирмаяскӧд, мый сетісны — сійӧ и шань лои.

Тадзи, колян вося моз, ӧтувтчытӧг уджавны оз позь. Ӧткӧн, асвыйӧн уджалӧм дзикӧдз помалас кер лэдзысьӧс. Топыда колӧ ӧтувтчыны, ӧтвылысь уджавны, сэки вӧлись кок йылад сувтан.

Дзик сы вӧсна таво Коми Обласьтса Кооперативъяслӧн Союз (Обсоюз) босьтчӧ ӧтувтны став коми кер лэдзысьсӧ артельясӧ. Ӧнӧдз ӧтувтчӧмаӧсь 700 морт 9 артельӧ.

Неважӧн Обсоюз чукӧртліс (удж панан съезд) кер лэдзысь артельясӧс. Сійӧ съезд вылын шуисны ӧтувтны быд артельӧс — важъясӧс и выльясӧс Обсоюз бердӧ. Быд артель мынтӧ 50 шайт зарниӧн членскӧй взнос.

Сійӧ жӧ съезд вылын бӧрйисны ӧти мортӧс Обсоюзбердса вӧр лэдзан секцияӧ (лесная секция); сійӧ секцияыс кутас велӧдны уджсӧ нуӧдны артельясас, юравны, веськӧдлыны. Кутас дорйыны, видзны фирмаяс дзескӧдӧмысь, нартитӧмысь кер лэдзысьясӧс. Удж панігъясӧн Обсоюз аслас инструкторъяс пыр кӧсйысис быд артельлы отсасьны уджсӧ нуӧдны.

Артельӧн уджалысьяслы бурыс со мыйта:

Ӧти-кӧ — вӧр ньӧбысь фирмаяслы лоӧ быдтор йылысь артелькӧд сёрнитны.

Мӧд-кӧ — артельлы фирма мынтӧ 2−4 урӧн унджык быд шайт вылӧ (кык-нёль прӧчент шусьӧ).

Коймӧд-кӧ — став сёян‐юан вылас водзвыв сетсьӧ.

Нёльӧд-кӧ — водзвыв лӧсьӧдӧм план серти кер лэдзӧм лӧсьыда срок кежлӧ эштӧ. Некодарсяньыс ылӧдӧм, кыв вежӧм оз вермы лоны. Сійӧ уджалысьяслы лӧсьыд дай миян государствоыслы пӧльза.

Коми войтыр! Таво кер лэдзан удж зэв уна тыдалӧ. Бур кӧ колӧ аслыныд — ӧтувтчӧй артельясӧ ӧти морттӧг, кер лэдзысьяс!

Ӧтувъя уджын ыджыд вын!