НЕМЕЦКӦЙ КОЛЧАК

Колчак йылысь ми быдӧн нин кывлім. Колчак вӧлі локтӧ Сибырсянь власьт босьтны Россияын. Сылӧн думыс вӧлі пуксьыны сарӧ да бергӧдлыны ставсӧ генералъяс пыр. Тӧдам, кутшӧма Колчакыд пӧдтыліс уджалысь йӧзтӧ: лыйліс, нӧйтліс, сотліс, джагӧдліс.

Ӧні Германияын лои сэтшӧм жӧ Колчак, немецкӧй Колчак, овыс сылӧн — генерал Секта. Сійӧ миян Колчак моз жӧ кӧсйӧ лӧсьӧдны Германияын.

Кӧсйӧ коммунистъясӧс бырӧдны.

Генерал Секта лэдзӧма приказ: коммунист партия пӧ да Союз Молодёжи лыддьысьӧны лэдзалӧмӧн (разялӧмӧн). Оз пӧ имеитны право Германияын явӧ лоны некутшӧм сэтшӧм комитетъяс, кодъяс сулалӧны (уджалӧны) коммунистъяс дор.

Тупкӧмаӧсь германияса коммунистъяслысь газет — «Гӧрд Знамя» («Красное знамя») Вютемберг карын да кутӧмаӧсь (арестуйтӧмаӧсь) куимсё коммунистӧс.

Коммунист партия оз кув!

Коммунистъяс сетісны Государственнӧй думаӧ (рейхстагӧ) заявленньӧ: тшӧктӧны пырысь-пыр жӧ вежны (бӧр босьтны) Секталысь приказсӧ. Коммунистъяс шуӧны: рабочӧйяс толькӧ серавны кутасны генералъяслысь татшӧм приказъястӧ. Коммунист партия оз кув, ещӧ ёнджыка босьтчас чуксавны уджалысь йӧзӧс путкыльтны лёк генералъяслысь власьтсӧ да лӧсьӧдны бур власьт уджалысь йӧзысь.

Берлинын (германскӧй столича) керка стенъясӧ ляскалӧма зэв уна плакатъяс (гижӧдъяс) коммунист партиялӧн. Став гижӧдыс чуксалӧ вермасьны лёк власьткӧд — озыръяскӧд да генералъяскӧд.