3 ВО КОМИ ИЗДАТЕЛЬСТВОЛЫ

Декабр 6-ӧд лунӧ тырӧ куим во Коми нига лэдзанін воссьӧмлы. Сійӧ лунсӧ колӧ казьтыштны коми войтырлы. Оз позь чӧв кольны сійӧ лунсӧ.

Бур олӧм, озырлун быд йӧзлӧн велӧдчӧм помын, сідзкӧ — нига, гижӧд помын.

Сизимӧд во Сӧветскӧй власьт шуд дорӧ быдпӧлӧс кыла уджалысь йӧзлы. Став кыла йӧзсӧ ӧткодяліс, нималіс. Со и ми, коми войтыр, нимасим, йӧз туйӧ кутім лыддьысьны. Ас ногӧн, ас кывйӧн велӧдчыны, овны позьны кутіс. Сэсся надзӧникӧн ми пыртім коми кыв школаясӧ. Коми йӧзлӧн шуд вӧлӧма на, абу на удитӧмаӧсь дзикӧдз ловсӧ пӧдтыны саръяс.

Петісны коми пытшкысь повтӧм сьӧлӧма том войтыр, босьтчисны чуксавны, садьмӧдны коми йӧзӧс асланыс сьылӧмӧн, ворсӧмӧн, мойдӧмӧн, гажӧдӧмӧн. Сыктывкарӧ лӧсьӧдісны Комиссия, сэтчӧ ӧтувтчисны уджавны, коми гижӧд лӧсьӧдны. Бӧрынджык Комиссияыс вежсис Нацменӧ.

1920 воын декабр 6-ӧд лунӧ Нацмен пыдди воссис Коми издательство — Коми нига лэдзанін. Удж нуӧдысь, юралысь, велӧдысь вӧлі В. А. Молодцов. Куим во на сӧмын уджалӧ Коми котыр, коми йӧзӧс паськыд югыд туй вылӧ петкӧдӧ. Куим воӧн Коми издательство лэдзис уна пӧлӧс нига, гижӧд: челядьлы и гырысьлы, коми велӧдчытӧм йӧзлысь синъяс восьталан нигаяс. Куим воӧн Коми муысь выльысь-выльӧ кыптісны выль гижысьяс (поэтъяс). Кодсюрӧ удитісны нин ловнысӧ пуктыны сійӧ уджӧ: вывті сьӧкыд кадӧ лои налы уджавны да. Куліны Иона Чисталёв, Педӧр Попов. Висьмисны чакоткаӧн В. А. Молодцов, А. А. Маегов.

Унаӧн на оз пыдди пуктыны коми уджсӧ. Шуӧны: комиӧн пӧ оз позь гижны ни, лыддьысьны ни, сёрнитны ни, вывті пӧ гӧль кыв. Найӧ оз гӧгӧрвоны ӧд: некутшӧм гижӧд кыв оз артмы другӧн, ӧти лунӧн. Гижӧд надзӧникӧн, дырӧн артмӧ, быдмӧ, содӧ, мичмӧ.

100 во сайын роч гижӧдыс, роч кывйыс ӧнія коми гижӧдысь, коми кывйысь на омӧль да гӧль вӧвлі. Рочьяслӧн гижӧдыс комияслӧн дорысь ёна надзӧн содӧма. Комияслӧн мыйта 3 воӧн артмӧма гижӧдыс, рочьяслӧн (роч литература мыччысигас) 25 воӧн сы мындаыс абу лолӧма. Та серти кӧ, позьӧ виччысьны — коми гижӧд роч дорысь ӧдйӧнджык кыптас, паськалас, мичмас, комилӧн бур олӧмыс, эмбур содӧмыс, озырлуныс культура кыптӧмын. Коми культура кыптӧмыс коми кывйын, коми гижӧдын.

Сідзкӧ, Коми Издательстволы сьӧлӧмсянь сиам кузь нэм. Мед сійӧ лунысь лунӧ содӧ, ыдждӧ, быдмӧ! Мед сійӧ би моз ӧзъялӧ, коми йӧзлы индалӧ, петкӧдлӧ туй, видзӧ вошӧмысь, нюрӧ-вӧрӧ кежӧмысь. Чукӧртчӧй жӧ, коми войтыр, кодлы дона коми йӧзлӧн культура кыптӧмыс! Ӧні повны некодысь — миян дор Сӧвет власьт, миян дор Коммунист Партия, миян дор став вежӧра веськыд йӧзыс.

Декабр 6-ӧд лунӧ казьтыштлӧй быд коми йӧз костын, висьталӧй, коді оз на тӧд, сы йылысь.