БЫРӦДАМ ПЕМЫДЛУН!

Важ правительствояс эз тӧждысьлыны йӧзӧс велӧдӧм вӧсна. Сійӧн и Россияыд пыр вӧлі гӧль.

Ӧні Сӧвет власьт мый вермӧ мырсьӧ йӧзӧс велӧдны, югдӧдны. Сійӧ шуис: дас во тыригкежлӧ Октябрса революциясянь мед став уджалысь йӧзыс Сӧветса Республикаын вӧлі велӧдчӧма (грамотнӧй).

Сэтчӧдз абу нин зэв ылын — коли сӧмын нёль во. Тайӧ нёль вонас ковмас миянлы зэв ыджыд удж вӧчны — бырӧдны пемыдлун (неграмотносьт). Роч йӧз пемыдӧсь-пемыдӧсь, а коми войтыр ещӧ на пемыдӧсь. Миян джын йӧзыс оз куж лыддьысьны ни гижны. Сы туйӧн коми йӧзыд вывті на улынӧсь мукӧд дорысь. Сідзинад миянлы ковмас зэв на ёна тільны-велӧдны азбукитӧ! Унджык велӧдчытӧмыс гырысь йӧз костын, торъя нин уна нывбабаяс костын.

Быдӧн нин ӧні тӧдӧны: велӧдчытӧг оз лолы бур олӧм.

Вот и колӧ ӧнісянь жӧ босьтчыны велӧдчыны. Тӧвнад уджыд этшаджык, велӧдчыны эштамджык. Чем ныв-зонлы ветлӧдлыны гуляйтны-войпукны, бурджык лоӧ, велӧдчыны кӧ кутчысясны. Аслыныс пӧльза перъясны дай государстволы бур вӧчасны.

Пемыдлун бырӧдӧм вӧсна миян тӧждысьӧны став гырысь йӧзыс. Со тайӧ лунъясӧ на Ставрочмувывса Исполкомысь председательыс т. Калинин ыстіс быд губерняса, быд уездса, вӧлӧсьтса да сиктса Исполкомъясӧ кабала (обращенньӧ), кӧні шуӧма: восьтавны быд сиктӧ велӧдчанін (рочӧн — «ликвидационный пункт»), чукӧртны сьӧм (деньга), судзӧдны велӧдчанторъяс (кабала, нигаяс, карандашъяс), босьтны став велӧдчытӧм йӧзсӧ лыдӧ (учёт вылӧ), тшӧктыны грамотнӧйясӧс велӧдны неграмотнӧйсӧ. Шуны кӧ, мед быд сиктын кылӧ ӧти гӧлӧс:

«Бырӧдам пемыдлун!»

Кутчысьлӧй жӧ, пемыд коми войтыр, тайӧ бур удж дорас!