ОТСАЛӦЙ РЕВОЛЮЦИЯ ВӦСНА ВЕРМАСЬЫСЬЯСЛЫ

Мувыв буржуйяс (озыръяс) олӧны медбӧръя кад. Найӧ асьныс тӧдӧны — регыд воас пом, регыд уджалысь йӧз путкыльтас налысь олӧм. Сы вӧсна озыръяс и топӧдӧны уджалысьясӧс: виалӧны (начкӧны), тюрмаясӧ пуксьӧдалӧны, быд ног бырӧдӧны революционеръясӧс — сэтчӧ озыръяслӧн тырмӧ на вынныс. Ӧні сё ветымын сюрсысь унджык уджалысь йӧзӧс буржуйяс сісьтӧны тюрмаясын. Уджалысь йӧз озыр кипод улын ымзӧны, пӧдӧны. Тшыгъялӧны налӧн и семьяясыс, вердны некодлы: вердысьяссӧ буржуйяс тюрмаясӧ сюйисны да лыйлісны. Зэв ыджыд нужда терпитӧны!

Кокньӧдны уджалысь йӧзлысь олӧмсӧ, сетны налы отсӧг да сьӧлӧм Коммунистическӧй Интернационал лӧсьӧдіс комитет, шусьӧ: Международное Общество помощи борцам Революции — МОПР.

Тайӧ обществоыс босьтчӧ быд ног отсавны мувыв уджалысь йӧзлы, революция вӧсна вермасьысьяслы. Тайӧ Обществоыс эм нин быд государствоын, миян Россияын пӧшти быд карын (эм и Сыктывдінкарын). Колӧ тайӧ Обществосӧ позтыны быд вӧлӧсьтӧ, быд грездӧ, быд заводӧ. Колӧ уджалысь йӧзлы пырны тайӧ Обществоӧ. Яткаын став йӧзыс — 50 сюрс морт, комын вит сюрсыс пырӧмаӧсь тайӧ Обществоӧ.

Коми йӧз! Лӧсьӧдалӧй быдлаӧ комитетъяс, пырӧй сэтчӧ шленъясӧ, отсалӧй мувыв коньӧръяслы, мед найӧ ӧдйӧджык вермасны озыръясӧс да вӧчасны миян кодь Октябрса революция жӧ!