ТЭ АБУ МЕНАМ

Чӧсмася сэтӧрӧн. Меланьӧ тэ
Видзӧдан нюмпырысь, пӧся.
Лов пытшкын ворсӧ быдса оркестр:
Сэн, быттьӧ ывлаын, лӧсьыд.

Тӧдан, ме тэкӧд «ола» нин дыр,
«Узьлывла» пельпом вылад,
Яг туйті орччӧн «восьлала» пыр.
Висьтавтӧг дойястӧ кыла.

Югыдлӧз синъяса медмуса морт,
Ӧтувъя шуд оз ло миян.
Аслад со овмӧс, гӧтыр дай горт,
Верстяммӧмаӧсь нин пиян.

Мӧвпъясын сӧмын ӧтлаын ми.
Збыль вылас тэ абу менам.
Сьӧлӧмӧс шонтӧ небыдик би:
Бара со видзӧдчан мелань...