АСЪЯ ГӦСЬТЪЯС

Садьми. Нюмъёвтіс сьӧлӧм.
Тані гӧсьтъяс нин, вӧлӧм.

Чӧвлун ветлӧдлӧ ньӧжйӧ,
бара ойбыртӧм вӧзйӧ.

Пельӧсын черань-пӧчӧ
везті надзӧник лэччӧ.

Тувсов тӧв воис кыськӧ,
бусӧсь джаджъясӧс чышкӧ.

Лэбач ӧшиньын дзользьӧ,
помтӧг кывзыны позьӧ.

Мелань енэжыс кывтӧ,
ывлавыв мичкӧд йитӧ.

Зарни кияса кыа
дӧра дзирдъясысь кыӧ.

Шонді югӧрыс пырис,
керка радлунӧн тырис.

Чолӧм, донаяс! Чечча.
Мыйкӧ чӧскыдтор вӧча.