ЭЖВАСА «У КАМЕЛЬКА» КЛУБЫН

Ме быттьӧ ловзи тайӧ рытӧ,
ӧд аддзи татысь уна ёрт.
Кор ӧта-мӧдӧс ловби йитӧ,
сэк шонді югӧр кодь быд морт.

Кӧть медводдзаысь локті татчӧ,
а гижысь войтыр матыс, ас.
Ме налы кола жӧ, Ен аддзӧ,
и тӧдмасьӧмным — шуда пас.

Ме лӧня пукалі да кывзі.
Гитара вӧтліс гажтӧмлун.
Поэзиялысь гӧлӧс шысӧ
эз пӧдты олӧм — наян тун.

А сёрни вочасӧн пыр ӧддзис
да юргис уна сьыланкыв.
И сьӧлӧм нимкодьпырысь бӧрддзис,
мед бара чужтыны бур кыв.