МЫЙ СЕТІС ОКТЯБРСА РЕВОЛЮЦИЯ
Мый жӧ Октябрса революция сетіс нывбабалы-крестьянкалы? Зэв унатор! Медвойдӧр сетіс видз-му — ӧткодя мужикъяскӧд. Сӧвет власьт, революция бӧрын, шуис: «Коді пӧ ачыс уджалӧ видз-му, сылы сійӧ и сетсьӧ». Быдӧн тӧдӧны — нэмысянь нывбаба ӧтмоз мужиккӧд уджаліс видз-му. Важӧн сар полициякӧд нывбабаӧс эз морт пыдди пуктывны, сэки нинӧм эз сетсьыв нывбабалы.
Октябрса революция ӧткодяліс став уджалысьсӧ. Ӧні нывбабалы быд уджалысь мужиккӧд видз-му ӧтмында и ӧткодя сетсьӧ.
Октябрса революция нывбабаӧс быдторйысь ӧткодяліс мужиккӧд. Ӧні нывбаба вермӧ бӧрйыны и ачыс бӧрйысьны быд сӧветскӧй службаӧ, быдлаын ӧні нывбабалӧн гӧлӧс ӧтыджда мужиккӧд.
Войдӧр сар озыр йӧзкӧд нывбабаӧс тюрмаын моз видзисны. Сӧвет власьтлы лои уна декрет лӧсьӧдны найӧс домысь мездыны. Войдӧр нывбабалӧн эз вӧв аслас нимыс. Верӧс сайӧ мунтӧдз бать нимӧн олӧ. Мыйӧн мунас верӧс сайӧ — мужик нимӧн, быттьӧ чача. Мый окотитіс мужик — сійӧ и вӧчис: нӧйтіс, видіс, виис. Пышйыны вӧлі оз позь: закон оз лэдз, кӧть сэсся мужикыд гусь-вӧр, вина юысь, йӧй. Паспортыд весиг вӧлі оз сетсьы нывбабалы. Мужик паспорт вылӧ гижлісны.
Ӧні быд нывбаба вермӧ босьтны торъя паспорт. Мужиккӧд кӧ олӧм лёк, сьӧкыд — пырысь-пыр позьӧ юксьыны.
Вермӧ кӧ мам челядьсӧ ачыс быдтыны, сылы жӧ сетсьӧ челядь. Юксигӧн тыр-бур пай сетсьӧ бабалы: видз-му, керка-карта, эмбур. Верӧс сайӧ мунтӧм нывбаба сідзи жӧ вермӧ тыр пай босьтны аслас семьяысь юксигӧн.
Сэсся Сӧвет власьт сьӧкыд нывбабаӧс мездӧ сьӧкыд уджысь, тӧлысь войдӧр челядясьтӧдз да тӧлысь челядясьӧм бӧрын.
Быдлаӧ лӧсьӧдалӧны челядясян керкаяс, мед быд мам дитяыскӧд вермӧ сэні бурдны, шойччыны челядясьӧм бӧрас. (Коркӧ и миян деревняясын лоӧны).
Октябрса революция лӧсьӧдіс Сӧвет власьт, Сӧвет власьт — уджалысь нывбабаӧс быд ног дорйӧ, видзӧ.
Коммунистическӧй партия лӧсьӧдаліс женотделъяс, мед нывбаба ӧдйӧнджык вермас ӧтувтчӧмӧн суӧдны уджалысь мужикъясӧс велӧдчӧмӧн да сюсьмӧмӧн.
Важ сьӧкыд, пемыд олӧм нывбабалӧн коли бӧрӧ нэм кежлӧ! Ӧні колӧ велӧдчыны коммунистическӧй партиялысь, Сӧвет власьтлысь, кыдзи мунны найӧ туйӧд, мед оз кежсьы бокӧ — мед чорыда нэм кежлӧ сьӧлӧм дорын лоӧ Октябрса революциялӧн став сетӧм бурыс! Мед кыпӧдчӧ, ёнмӧдчӧ рабочӧя-крестьяналӧн государство!
