МЫЙ СЕТІС ОКТЯБР КОМИ ЙӦЗЛЫ

Воддза власьтъяс — саръяс да озыръяс — эз видзӧдлыны мукӧд сёрниа йӧз вылӧ. Сэтшӧм жӧ нимтӧм йӧзӧн вӧлім и ми — коми войтыр. Овлім быттьӧ шыбитӧм, эновтӧм йӧз. Некод эз тӧждысьлы коми вӧсна. Коми кыв лыддьылісны шогмытӧм кывйӧн — «пон кывйӧн». Школаясын первойсяньыс велӧдлісны рочӧн, школаын оз позь вӧлі весиг сёрнитны коминад! Миянлысь эмбур кыпӧдӧм вӧсна некод эз думыштлы. Миянӧс югдӧдны вӧлі некодлы.

Лёка, пемыда, омӧля войдӧр видзлісны коми йӧзӧс!

Октябрса революция мездіс став рабочӧйясӧс да крестьянаӧс озыръяс кипод улысь. Сӧветскӧй власьт сідзжӧ сетіс вӧля и став мукӧд пӧлӧс сёрниа йӧзлы. Став уджалысь йӧз Россияын ӧткодьӧсь (равноправны).

Квайтӧд воын Октябрса революция бӧрын став йӧзсӧ Россияын ӧтувтӧма ён чукӧрӧ — Союз Советских Социалистических Республик.

Ӧні Россияын эм комын автономнӧй республика да обласьт. Мукӧд сёрниа йӧзлы сетӧма права кыпӧдчыны, велӧдчыны асногса олӧм серти.

Сетіс Сӧветскӧй власьт сэтшӧм жӧ права и миянлы коми йӧзлы — август 22 лунӧ 1921 воӧ восьтіс автономнӧй Коми Обласьт. Коми йӧз ӧні мукӧд войтыръяскӧд ӧткодьӧсь. Миян вӧсна Сӧветскӧй власьт тӧждысьӧ мукӧдъяскӧд радысь. Кыдзи позьӧ — пыр кокньӧдӧ. Коми кыв некод оз серав. Коми олӧм паськалӧ-кыптӧ асногса удж серти.

Татшӧм праваыс став му вылас сӧмын Россияын! Быдлаын сэсся озыръяс личкӧны на посньыдджык йӧзӧс.

Сизимӧд во вылӧ петігӧн ми шуам:

Мед Октябрса революциялӧн бур вӧчӧмыс оз вун коми йӧз костын! Сійӧ мездіс миянӧс пемыд олӧмысь.