БӦРДАНКЫВ

Тэд шулі уна мелі кыв.
Тэ сынӧд моз жӧ меным колін.
Жаль, ӧні менӧ он нин кыв.
Зэв недыр му вылас тэ олін.

Пыр вӧлі пызан вылад сур.
А нӧшта — ма да чӧскыд чери.
Мем тэкӧд орччӧн вӧлі бур.
Друг ставыс казьтылӧмӧ пӧри.

Тэ ыджыд из кодь вӧлін ён.
Тэ радейтін став ловъя ловсӧ.
Тэ тӧдін ёртасьӧмлы дон.
Ас лов пыр сӧдзтін йӧзлысь дойсӧ.

Тэд шулі уна мелі кыв.
Тэ сынӧд моз жӧ меным колін.
Жаль, ӧні менӧ он нин кыв.
Зэв недыр му вылас тэ олін.