ОВ ЖӦ, ДОНАӦЙ, ОВ!

Менӧ тешкодя чуксалан
югыд синмаӧн, эзысьӧн.
Тэнад, енэж кодь мусалӧн,
мулысь дой кылысь лов.
Зумыд ниа моз сулалан
ас йӧз дор, лёккӧд вермасян.
Кодзув моз ӧзъян-чусалан,
некодысь тэ он пов.

Шойччыны шоча пуксьылан,
шпуткан-куритчан ӧтнасӧн.
Гортын, вӧр-ваын картӧм на
уна удж, помтӧм мог.
Сӧмын код юрӧн юксьылан
сьӧлӧмтӧ йирысь тӧждъясӧн.
Топыд гезъясӧн гартӧма
вына морӧстӧ шог.

Чужан вужъястӧ туялан,
веськыдлун вӧсна бертчысьӧй.
Тэнад, ас шудӧн шудалӧн,
мича ним-вич да ов.
Синъяс водзын пыр сулалан,
менам дорйысьӧй, мездысьӧй.
Бурлань дӧзмытӧг чуйдалан.
Ов жӧ, донаӧй, ов!