ШУШТӦМ ВӦТ

Тавой вӧтаси шуштӧмтор.
Улыс дӧрӧмӧн войбыд шӧйті.
Небыд вольпасьысь чеччи, петі,
лэччи ю дорӧ пемдандор.

Изъя берегті муні дыр.
Шувгис вӧрыс сэн, шлывгис юыс.
Пемдіс ывлаыс, кӧйдіс муыс.
Водзын тыдовтчис джуджыд кыр.

Сэні, кыр улын, быдмӧ бадь.
Тӧдтӧм гӧлӧсъяс кылі матысь.
Кытчӧ дзебсьыны, мунны татысь?
Кысси бадьяслань сы ни садь.

Садьӧ вои да пышйи сэсь.
Сырми полӧмла, тіпкӧ сьӧлӧм.
Дыркодь котӧрті вадор пӧлӧн.
Войся енэжыс вӧлі сэзь.

Коркӧ помасис вадор видз.
Вои кутшӧмкӧ ыджыд карӧ.
Йӧктысь йӧз пӧвстӧ сюри, барӧ.
Юрӧй лётмуні, мудзи сідз.

Менӧ сывйыштіс мустӧм морт,
мыйкӧ мисьтӧмӧс пельӧ шӧпкис,
сэсся лёк ногӧн менӧ йӧткис...
Садьми, син водзын — аслам горт.

Тадзи помасис сьӧкыд ун.
Менам керкаын югыд, шоныд.
Лоис лов вылын нимкодь, долыд.
Вошис майшасьӧм, воис лун.