РАЙСА ЛЭБАЧЬЯСА САДЪЯС

Вода — бӧрда, сувта — бӧрда,
мыйла, сӧмын ачым тӧда.
Петны эськӧ мир туй вылӧ,
мунны татысь ылӧ-ылӧ.

Сэтчӧ, кӧні шуда муяс,
гӧравывса посни юяс,
райса лэбачьяса садъяс,
еджыд дзоридзьяса вадъяс.

Сэтчӧ, кӧні радлун олӧ,
кӧні вывті долыд овлӧ,
йӧзыс шаньӧсь, восьса лолӧн
чӧсмӧдӧны няньӧн-солӧн.

Сьӧкыд петны мир туй вылӧ,
мунны татысь ылӧ-ылӧ.
Мыйла, сӧмын ачым тӧда.
Вода — бӧрда, сувта — бӧрда.