РЫТЫВ-ВОЙ ТӦВ

Инӧ оз ӧшйы рытыв-вой тӧв.
Кучкас да дзебсяс, быттьӧ эз вӧв.
Здук мысьти сьывйӧн бергӧдчас бӧр.
Ас пытшкас быттьӧ сійӧ оз тӧр.

Бытшкасьӧ лымйӧн, мунны оз сет.
Ывлаӧ понмыс весиг оз пет.
Сюрин кӧ татчӧ, ас гӧгӧр педз —
воськовтны водзӧ тӧвныр оз лэдз.

Эрд вылын ассьыс петкӧдлӧ вын.
Кутлас кӧ, ӧддьӧ сыысь он мын.
Ӧвсьытӧм чӧрс моз бергӧдлӧ лым.
Вазьӧны синъяс, ныр-вомӧй пым.

Кок йылысь мортӧс уськӧдны дась.
Вильшасьӧ, нетшкӧ ме вылысь пась.
Вӧвлытӧм тӧлыс некор оз вун,
ӧтмоз ӧд дона меным быд лун.