ЛЫМЙӦН НИМКОДЯСЬӦ ЛУН

Лымйӧн нимкодясьӧ лун.
Сылысь сьыланъяссӧ кыла,
гажа мылӧн ола-выла.
Некор татшӧмыс оз вун.

Гӧгӧр абу пон ни морт.
Енъюгыдӧн ывла ӧвтӧ.
Лолӧй сералӧ и бӧрдӧ,
ичӧтсянь ӧд ягыс — горт.

Йи кодь киа тувсов тӧв
вашкӧ бадьлы мелі кывъяс,
да и ньывъяс — мича нывъяс
сылы мусаникӧсь зэв.

Менам нывъёрт тані эм,
статя пожӧм — Войвыв Пальма,
пашкыр юра, аслыссяма.
Вывті дона сійӧ мем.

Шуда гозъя — кыдз да коз —
кутлысьӧны со тай бара...
Кад нин бергӧдчыны карӧ,
сӧмын пыксьӧ важ лызь гоз.

Ягысь он на ӧдйӧ мын.
Лымчиръяслы восьта мӧвпъяс,
гуся кӧсйӧмъяс да вӧтъяс.
Чӧжсьӧ сьӧлӧмын выль вын.