СЫКТЫВ Ю ДОРЫН

Межадор сиктлы сиа

Кыа чолӧмалӧ юсӧ,
сыкӧд сывъясьӧмӧн кусӧ.
Зарни рӧмӧн ваыс ворсӧ.
Унзільпырысь каля горзӧ.

Шондіасьӧ ва дор виддзыс,
шензьӧдана сылӧн мичыс.
Изсир войт кодь дзоридз уна.
Лысва кузя ньӧжйӧ муна.

Гашкӧ, и Куратов ветліс
таті, Сыктыв юлань петліс
сэк, кор воліс Межадорӧ
Афанасий вокыс дорӧ.

Мӧвпалігтыр ваӧ кела,
мысся, кывза гулыд йӧла.
Ыркӧдчышта тэрыб тӧлӧн.
Сиктлань кежа ыбъяс пӧлӧн.

Ывла кыпъялӧ да радлӧ
асывлы да гожся кадлы.
Татысь эськӧ ог и мунлы.
Сиа шудлун Сыктыв мулы!