ИЗЬВАТАС КЫВЛЫ

Тэ первой лым кодь сӧстэм, небыд.
Тэ вадор из кодь мольыд, крепыд.
Том ижемкаяс кодь же жалькодь.
Тэ дзоридзалысь льӧмлэн чаль кодь.

То бузган гора тувсов шорен,
то лӧня шарган арся коръен,
то лым чиръясэн усян вывсянь,
то чарда-гыма зэрен киссян.

Но мыля мукеддырйи, кылан,
тэ коми кывлы паныд сынан?
Пыр юртэ чатыртэмен олан,
но тэ и татшемен мен колан.

Пым рачаэн ме тэнэ сёя,
кор олэм-вылэм вывті доя...
Ме мӧда, медум му шар вылын
тэ, мада кылэ, нэмтэ кылін!