ВЫЛЬ ВОӦН!

Во помын верстьӧыс овлывлӧ кагаӧн,
вӧчалӧ челядькӧд лым чир да моль,
мичмӧдӧ коз пулысь лапъяссӧ чачаӧн,
дзеблалӧ лыс пиӧ кампет да коль.

Выль вося дукъясӧн кыпмунлӧ сынӧдыс.
Дзоляник шонді кодь виж мандарин.
Праздниксӧ виччӧмыс лов-виртӧ пымӧдӧ,
ланьтӧдӧ дойястӧ, содтыштӧ вын.

Шоглунлӧн кузьӧсь да чорыдӧсь киясыс,
мынтӧдчы наысь, важ воыслы сет.
Зарниӧн пӧртмасьысь выль вося кыаыс
шудтор, кӧть неуна, козьналас тэд!

Мед лоас енэжыс бурторсӧ сиӧмӧн!
Сійӧс он пӧрйӧдлы, Енмыс кӧ эм.
Мортыд ӧд быд лунся олӧмӧн-вылӧмӧн
петкӧдлӧ, мый вылӧ сетӧма нэм.