ШОГ

«Ыджыд шогыд некор оз сьӧдъяммы».
(шусьӧг)

Кор суис пемыд арся войӧ
лёк юӧр — кулан выйын пи,
сэк вӧйи нюр кодь зыбуч дойӧ,
и эг кут кывны кок ни ки.

Быд здук ме корси, кори Енмӧс,
быд здук! И сыліс, сыліс сись.
«Тэ кӧнкӧ эм-ӧ, Енмӧй, эм-ӧ,
и аддзынысӧ тэнӧ кысь?

Тэ мыйла кадысь водз пыр босьтан
бур сяма йӧзлысь сӧстӧм лов?
Дзеб аслад райысь ӧдзӧс восьтан,
тэд менам кагаӧй оз ков.

Дзик веськыда ме Тэлань муна,
ог чеччы юрбиттӧг, ог вод.
Кӧть абу мыжтӧм, грекӧй уна,
эн ёр, и челядьӧс эн дойд».

Тадз олі вичкоын, кыдз гортын.
Ас садьӧ воис сэки пи.
Мед бурдас, лоас прамӧй мортӧн,
мед шонтас сійӧс муслун би.

Оз прӧста шуны «Ен мед видзас».
Ме аддзи Сійӧс, Енмыс эм.
Мед эскӧм сьӧлӧмъясӧдз йиджас
да кузьджык лоӧ олан нэм.