ГЕРМАНИЯ ЙЫЛЫСЬ
Ӧні став му кузя лэптысьӧ ён кось. Косясьӧны уджалысь йӧз озыр кӧзяинъяскӧд аслас олӧм понда, шусьӧ сійӧ косьыд классӧвӧйӧн. Кор лэптылісны буржуйяс мирӧвӧй война, чирсісны уджалысь йӧзӧс (рабочӧй да крестьянаӧс) ас барыш понда, рӧзӧритісны став олӧм война рӧскод вылӧ, — сэки ладыс олӧмыдлӧн став му кузя и торксис. Буржуй кыскӧ асланьыс бара вир юны рабочӧй да крестьяналысь, найӧ оз сетчыны, шуӧны: колӧ пӧ оланногсӧ вӧчны ас киӧн, мед пӧ уджалысь ки улын вӧлі власьтыс. Миян Россияад со квайт во нин сідз. Гӧльӧсь, коньӧрӧсь, пемыдӧсь ми, кымынкӧд эгӧ косясьлӧй, мыйыскӧд эгӧ вермасьлӧй — ставсӧ вермим! Вермӧ тай, вӧлӧм, быдтор вӧчны уджалысь мортыд и озыр буржуйтӧг.
Ӧні миян кодь жӧ революция тыдалӧ Германияын.
Мирӧвӧй война бӧрад, кор вермисны Германияса йӧзӧс, налы английскӧй да французскӧй буржуйяс пуктісны зэв ыджыд дань. Топалі Германия, мый керсьыны? Государстволӧн доход ньӧти абу, буржуйяс озырмӧмаӧсь, деньга дон быд лун усьӧ. Озыръяс повзьӧмаӧсь, тірзьӧны, ӧружитчӧмаӧсь гӧль йӧзӧс вины, важ права кутны. Рабочӧйяс Германияын уна, кызь миллион кымын, нуӧдысьяс-коммунистъяс оз плӧшайтны. Мӧдарас бара жӧ сила. Войска, фашистъяс, дай став озырлуныс. Государствоыс на дор. Кодарыс вермас — регыд аддзам.
Быд лун воӧ Германиясянь кутшӧмкӧ да кутшӧмкӧ юӧр. Тӧдчӧ, чорыда лыбас кось. Вермасны кӧ рабочӧй да крестьяна ӧтувтчӧмӧн — пом вӧчасны озыръяслы, Сӧвет власьт восьтасны, миянкӧд союзитчасны (ӧтлаасясны). Сэки ён лоӧ и миян власьтыд, регыдджык кыптас олӧмыд! Германияад зэв уна быдсяма пабрик-заводыд, миян Россияад уна сёян-юанъяс, быдтор эм пабрик-заводлы (
Вермасны кӧ германскӧй буржуйяс — рабочӧйлы воас пом. Сэки чеп йылӧ пуксьӧдасны, усьтӧдзыд уджӧдасны, олӧм ногсӧ пуктасны сьӧкыдӧс, недруг сэсся корсян ассьыд права! Сійӧ на ӧмӧй! Оз терпитны и миянӧс: «Заодно пӧ и тіянлысь оланногтӧ чирсам, со пӧ тіянлы сар-батюшко, купеч-помещик, буржуй-фабрикант, — тільсьӧй пӧ, пессьӧй на вылӧ!»
Рабочӧйяс да крестьяна пикӧ воисны. Найӧс топӧдӧ озыръяслӧн власьтыс дай олӧм ладыс. Ӧти партия (фашистъяс) шуӧны: «Огӧ пӧ сетчӧй Сӧветскӧй власьт вӧчны, колӧ пӧ чорыда кутны важ буржуй пӧрадок. Колӧ пӧ став коммунистсӧ вины!» Да-й виӧны, начкӧны, тюрмаӧ сюйӧны. Коммунистъяс шуӧны став Германияса уджалысь йӧзлы: «Кывзӧй пӧ миянлысь, видзӧдлӧй пӧ олӧм вылад! Голя вылад пӧ кӧзяин-буржуй, виртӧ юӧ, тэ пӧ тшыг, а сійӧ польдӧ тэнад уджӧн, грӧзитчӧ тэнӧ нинӧмӧ воштыны, кӧртвомавны. Колӧ пӧ ӧні жӧ лэптысьны став уджалысьлы (рабочӧйлы да крестьяналы) ӧтвыв аслыд права корсьны, Сӧветскӧй власьт перйыны!» Тайӧ кык партия костас ещӧ на эм ӧти сикас партия — «Социал-демократъясӧн» асьсӧ шуӧны. Найӧ дугдывтӧг ӧнӧдз на пӧрйӧдлісны уджалысь йӧзтӧ, век миритісны, ланьтӧдісны косьысь, а рабочӧйлысь олӧм эз вермыны бурджыка вӧчны. Рабочӧй кывзіс, кывзіс налысь, дай шуны кутіс: «Ті пӧ тай озыръяс дор, — пошёл чӧрту!» Ӧні рабочӧйяс локтӧны коммунистъяс дорӧ, чукӧртчалӧны (дерт, гусьӧн) косясьны, лэптывны ыджыд кось — рӧщӧт вӧчны буржуйяскӧд. Вайӧ жӧ думыштамӧ ӧні, кутшӧм делӧ миянлы Германияӧдз?
Германскӧй рабочӧй да крестьянин миянлы абу врагъяс, найӧ бур другъяс миян. Топалӧминад ми век отсалам. Отсалам мыйӧн вермам джагӧдны буржуйӧс. Чорыда шуам став мувыв буржуйяслы: «Миянӧс не вермыны, тіян олӧм-сарствуйтӧм пӧраыд коли! Миян дор став уджалысь йӧз. Эн вӧрӧдӧй миянӧс, ачыд дойман!»
Крепыдджыка ӧтувтчӧй крестьяна рабочӧйяскӧд!
Грамотнӧй йӧз! Паськӧдӧй деревняса йӧз костӧ юӧр Германия йылысь! Висьталӧй, садьмӧдӧй! Сёрнитӧй, топӧдчӧй Сӧвет власьт бердӧ, коммунистъяс дорӧ!
Локтан праздникъясӧ, квайт во тыран Сӧвет власьт улын олӧм лунӧ, петӧй демонстрация вылӧ уджалысьяс, гырысь и посни, да ыстӧ поклон Германияса уджалысьяслы: «Ми пӧ тіянкӧд — энӧ полӧй!»
Парма.
