ВЕЛӦДЧӦЙ ВЫЛЬ НОГӦН ОВНЫ

Визин вӧлӧсьтын быд грездӧ локтӧ журнал — «Красная деревня». Тайӧ журналыс зэв бур! Ставсӧ пӧшти гижӧ деревня йылысь, выль ногӧн олӧм йылысь. Сэтысь крестьяна аддзӧны быдсяма декретсӧ и законсӧ Сӧвет власьтлысь. Велӧдӧ, кыдзи бурджыка видз-му уджавны, унджык пӧльза сыысь босьтны; кыдзи восьтыны кооператив да кыдз сійӧс озырмӧдны; кыдз колӧ торйӧдчыны видз-му уджалан артельясӧ (с.-х. артели и коммуны), кутшӧм пӧльза сыысь крестьянинлы, кутшӧм отсӧг сетӧ Сӧвет власьт артельӧ ӧтувтчысьяслы. Став журналыс висьталӧ, кыдзи колӧ овмӧс кыпӧдны крестьяналы. Колӧ эськӧ быд вӧлӧсьтӧ тайӧ журналсӧ судзӧдны, дай быд грездӧ! Сӧмын крестьяналӧн деньгаыс абу. Ме ассянь ысті «Красная деревня» редакцияӧ витсё (500) чӧлкӧвӧй, кори Койгортӧ куим тӧлысь чӧж ыставны «Красная деревня» вит (5) журналӧн быд номер.

Зэв эськӧ бур лоас, быд вӧлӧсьт кӧ аслас грездъясӧ (деревняясӧ) босьтчас судзӧдны ӧти журналӧн — «Красная деревня».

Нолтӧ, коді медводз?

Адресыс со: Петроград. Проспект 25 октября (быв. Невский), №1. Редакция журнала «Красная деревня».

Ас морт.