КӦДЗӦЙ БЫДӦН СІСЬМЫТӦМ ТУРУН!

Миян Коми муын унаысь став турунным сісьмылӧ, кылавлӧ тавося моз; кос воясӧ бара оз быдмы турун. Унаысь сьӧкыд овлывлӧ тӧв коллявны, скӧтлы ёна лолӧ тшыгъявны. Аръяснад быд во нин мырсям турунтӧмла. Мукӧдлӧн эськӧ и эм туруныд, да уна ва сайын. Вуджӧдчӧмыд абу кокньыд. Пыр пикӧ воӧмаӧсь.

А вӧлӧм ар кежлад позьӧ сісьмытӧм турун лӧсьӧдны.

Ми таво, агроном висьталӧм кузя, му пельӧсӧ (сӧмын 70 квадр. сыв пасьтаӧ) кӧдзлім 30 зӧлӧтник скӧт сёян сёркни (турнепс). Сыктывдінкаргӧгӧрса йӧз быдӧн аддзылісны сійӧ сёркни тыра муторсӧ, «пода туйӧд» ветлігӧн да сёркнисӧ видлалігӧн. Воис эськӧ 30 зӧлӧтниксьыд дзик 100 пуд, да костті лои нетшкыны, самӧй быдмигас: Сыктывдінкаргӧгӧрсалӧн пемыдлуныс да йӧйлуныс эз лэдзны тыр-бурсӧ босьтны кӧдзысьыслы.

Вӧліны нин квайт пунта сёркнияс, эськӧ вермис быдмыны кык-куим мында унджык. Лун и вой гырысь и посни эз кутны му вылысь петавны, бӧрыннас кутісны мешӧкъясӧн новлыны.

Со ӧд кутшӧмӧсь: асьным немтор выльсӧ-бурсӧ огӧ вӧчӧй — дай йӧзсӧ торкам, быд ног пакӧститам! 100 пуд пыддиыд босьтім сӧмын 40−50 пуд, и сійӧ на вель ён отсӧг лои ар кежлӧ. Сёркни зэв юмов, дзик морт сёян сёркни кодь. Куканьлы пуӧмӧн, пызьыштӧмӧн сетам бурджык вылӧ, турунным абу да. Сёйӧ зіля и кыннас. Не тайӧ сёркниыд кӧ, куканьӧс лои нин начкыны. Ӧні ар пом позяс тайӧ сёркниӧн джын турунӧн коллявны. Ме чайта, оз омӧльтчыны мӧсъяс, йӧвтӧ куш сісь туруннад вердӧм дорысь унджык сетасны.

Скӧт видзысьяс, видз-му уджалысьяс! Ӧні асланыд синнаныд нин аддзылінныд, кинаныд видлалінныд, кутшӧма позьӧ быдӧнлы татшӧм турунтӧ вӧдитны, сӧмын оз ков дышӧдчыны, оз ков жалитны му пласттӧ торйӧдыштны сы вылӧ. Сэки оз ковмы йӧз му вылӧ пырны, йӧзлысь уджсӧ, мырсьӧмсӧ травитны.

Колӧ, ёртъяс, велӧдчыны мӧда-мӧдлысь уджтӧ пыдди пуктыны, дон тӧдны. Думыштӧй быдӧн сідзи, уджалысьяс, да мӧд во кӧдзӧй асьныд, энӧй таскайтӧ йӧзлысь кӧдза пуктас. Кӧйдыс эм Земотделын, кӧдзны велӧдасны агрономъяс. Сы йылысь лоӧ гижӧд Коми календарын, лыддьӧй!