КРЕСТЬЯНИН, ГАЗЕТ ТЭНАД! ГИЖ СЭТЧӦ!
Шоч крестьянин оз кывзы газет. Шоч оз юась, кӧн‐мый кывсьӧ, кӧн‐мый вӧчсьӧ.
Шоч оз корсь мыйкӧ бурджыкӧс. Миян коми олӧмын зэв на этша бурыс. Бурыслы некор на лоныс. Регыд на ми сувтім выль туй вылас. Воддза воясӧ ми эгӧ на вермӧ веськӧдчыны важ доймалӧмъясысь. Дыр на лоӧ сувтны кок йылӧ.
Мӧда-мӧдлы отсавтӧг, дерт, огӧ сувтлӧ. Колӧ туйдӧдӧм, отсӧг.
Некытчӧ ветлытӧг, некытчӧ петавтӧг, некодлысь юасьтӧг и бурсӧ аддзывтӧг ми ассьыным овмӧс нэм огӧ кыпӧдӧ, огӧ вермылӧ, огӧ кужлӧ.
Лоӧ писькӧдчыны миян сьӧкыд, лёк вын песӧм олӧмысь быд ногыс. Лоӧ кыссьыны, каттьысьны водзӧ усьӧмӧн, чеччӧмӧн.
Весьшӧрӧ ми мӧвпалам, мый ми кындзи, коми зарни йӧз кындзи, сэсся и олысьыс му вылас абу.
Эм уна. Миянысь, сьӧд мыръяс кодьысь, сюсьджыкыс, гӧгӧрвоаныс, ладаыс уна эм. Лыдтӧм.
Налысь лоӧ миянлы велӧдчыны. Асланым дедовскӧй, важногса, пӧльясногса олӧмӧн, вежӧрӧн, уджӧн ми кутім пӧдны.
Лоӧ веськӧдчыны миянлы мӧдарӧ. Олӧмыс воысь воӧ вежсьӧ. Миянлы, бӧрӧ, бӧжӧ кольӧм войтырлы, воысь воӧ олӧмыс кутас сьӧктавны.
Грамотатӧг, выль вылӧ велӧдчытӧг ми изъясям, джумдам дзикӧдз.
Колӧ корсьны выль туйяс. Бӧр воясӧ ми уськӧдчим видз-му паськӧдны. А кытчӧ? Ми ён асык пиын нин. Лоӧ уськӧдчыны вӧрӧ, выльысь овмӧдчыны, пышйыны ю йывъясӧ. Сэтчӧ пуксьыны.
Торъя кокни нажӧткаяс миян оз туплясь. Лоӧ кыв нюжӧдтӧдз корсьысьны. Кыйсьӧм, вӧр лэдзӧм миянӧс этша мездӧ. А дыр-ӧ кежлӧ сійӧ миянлы тырмас? Таво эм, мӧд во абу.
Воссьӧ завод туй. А сэн ми йӧйӧсь, пемыдӧсь. Весиг грамотаыс, кывворыс абу.
Ставыс кучкӧ сэтчӧ, мый миянлы чорыда лоӧ думыштны: мый керны, мый дорӧ топыдджыка кутчысьны, кодарӧ веськӧдчыны.
Ӧткӧн-ӧткӧн ми вошам. Колӧ артельӧн артавны, сёрнитавны, кутшӧмкӧ бурджык ӧти сикаса кывйӧ лӧсьӧдчыны.
Комилӧн ӧні эм газет. Кызвыныс оз весиг кӧсйы видзӧдлыны сы вылӧ. Сьӧласьӧ, пӧлясьӧ.
Лоӧ, другъяс, коркӧ и сьӧлалӧмсӧ бӧр нювны, да сёр лоӧ.
Сюсьджыкъяс оз шыблавны газетӧн. Лыддьӧны.
Быд буржуй газеттӧ розьӧдлытӧдз лыддьӧ, бергӧдлӧ, аклялӧ да думайтӧ, кыдз эськӧ кодӧс бурджыка да чорыдджыка позьӧ доддьыштны. Войсӧ оз узь, а газет лыддьытӧг лун оз коль.
Газетын быдтор сійӧ аддзӧ, ставсӧ гӧгӧрвоӧ, во кежлӧ, кык во кежлӧ арталӧ водзӧ. Кужӧ и бӧбйӧдлыны ми вокӧс!
Эн вунӧдӧй, коми другъяс, газет ми гижам огӧ буржуйяслы, а аслыным уджалысь йӧзлы.
Ӧнія газет — миян газет. Сӧмын кужӧй сійӧн «пӧльзуйтчыны», кужӧй ас колан ногнаныд сійӧс пуктыны.
Колӧ гижны газетӧ. Мый корсяд, сійӧ и сюрӧ сэсь.
