ТШАЙНИК

Тит Вань Ӧльӧш ымзіс-бергаліс вольпасяс. Корсюрӧ мыйкӧ гӧгӧрвотӧма горӧдлывліс, чужйышталіс киссьӧм подъя носкиа кокнас. Сэсся друг черӧбмуніс да восьтіс гырдмӧм синъяссӧ.

Гӧгӧрвотӧма видзӧдліс гӧгӧрбок да сьӧкыда пуксис крӧвать вылас. Лэдзис позялӧм кокъяссӧ джоджас, лэдзчысис гырддзанас пидзӧс вылас да дзӧрысь кинас пыкис сьӧкыд юрсӧ. Ыджыда ышловзис.

— Ы-ы-ых, — Ӧльӧш зыралыштіс порсь тшӧть кодь чорыд тошсӧ, — вӧтавсяс жӧ быд страсьтсӧ... Б-р-р!

А вӧтавсис сылӧн и збыль страсьт. Быттьӧ кузь сюра, кӧза тошка, ӧгралысь синъяса мути кватитіс сійӧс юрсиӧдыс, чеччыштіс-пуксис пельпом вылас, топӧдіс сьылі гӧгӧрыс чорыд, гӧна кокъяссӧ да плеть кодь бӧжнас вӧлӧс моз вачкалігтыр кутіс гӧньлӧдлыны вильски-вальски няйт туй вывті. Усьӧ-чеччӧ, рӧдтӧ Ӧльӧш, а мутиыс нимкодя руксӧ, чиктылӧ да бӧжнас нӧйтӧ и нӧйтӧ коньӧрӧс. Сэсся друг быттьӧ мутиыслӧн киас вина доз лои. Бӧж помнас ветьӧкӧн моз чышкыштіс лёкнога чурвидзысь водз пиня мисьтӧм вомсӧ да «Прима» пачкаӧн закуситіс — дзоньнас сюйис вомас да акляліс. Пеж вомсьыс виж быг лэччӧ. Ӧльӧшлы эськӧ окота жӧ юыштны, да оз лысьт корнысӧ. Мутиыд быттьӧ сэсся и кисьтіс жӧ Ӧльӧшлы. Стӧкан тырыс. Ӧльӧш кватитіс кыкнан кинас да кутіс горша юны. Юӧ да юӧ, юӧ да юӧ, некыдз оз вермы помавны. А аслыс быттьӧ и нимкодь, винаыс уна да. Сэсся мисьтӧм чужӧмаыс кыдз тай уськӧдчас-шашаритчас кузь гыжъяса лапа-кияснас Ӧльӧшлы голяас да руксігтырйи кутас джагӧдны. Страсьт! Ымзӧ-мездысьӧ Ӧльӧш, пессьӧ-мырсьӧ, коньӧр. Жуяліс нин. Тайкӧ и пӧдас-джагалас... Слабог, садьмис...

Ӧльӧш неуна пукыштіс на, сэсся ойӧстіс, ружӧктіс да сувтіс кок йылас. Шатласигтыр довгис ва пельсалань. Кок улас, кылӧ, гольмуніны-пӧрины тыртӧм дозъяс. Ӧльӧш кватитіс кӧшсӧ, гумовтіс тырыс жуньышмӧм нин васӧ да горша юис. Сэсся нӧшта на кӧш джын содтіс. Видзӧдліс джоджас голялысь «Троя» сулеяяс вылӧ, да мышку кузяыс весиг йирмӧг котӧртіс. Плеш вылас чепӧсйис кӧдзыд ньылӧм: «Сы мындасӧ нӧ Ликӧ Васьыскӧд кыкнас кыдзи юсьӧма? Али нӧ кодкӧ нӧшта пыраліс? Б-р-р... Ог помнит, лешак машинаыд...»

Зывӧкпырысь вешталіс-чукӧртіс кокнас пачводзлань тыртӧм дозъяссӧ. Сэсся матыстчис пызан дорас да синмаліс пызан вывсӧ. Кык няйт кружка, тыртӧм кильки банка, чорзьӧм сьӧд нянь корка да сьӧд, чигарка помъясӧн тырӧм жӧч банка кындзи нинӧм абу... Ӧльӧш сьӧкыда пуксис улӧс вылӧ да ымӧстіс:

— Ой-ё-ёй-й!.. Ог вермы-ы-ы... У-уп... Сэсся мед коркӧ юа тайӧ страм «Троясӧ»! Некор сэсся ог ю... Шабаш!

Пукыштіс. Сэсся босьтіс ӧти кружкасӧ да матыстіс ныр дорас, исыштіс.

— Фу-у, пеж! — Ӧльӧшӧс лёкысь кезнитӧдіс, но кружкасӧ мыйлакӧ бӧр матыстіс вом дорас. Чуньлыс мында кольыштӧм сорассӧ кисьтіс тӧчила кодь пыктӧм кыв вылас да тяпкӧдчыштіс. Друг Ӧльӧшӧс шогӧдіс, ставыс муткыртчис-гудыртчис. Сійӧ уксігтырйи котӧртіс таз дорӧ да синва петмӧныс ойзіс-восіс. Сэсся содз тырнас койыштіс мыссян чуманысь пыкталӧм чужӧмас кӧдзыд васӧ, чышкыштіс воймӧм нин ки чышкӧдӧн да бӧр довгис пызан дорас. Синнас корсис куритчан пачка. Нинӧм абу. Гӧгӧр куш. Лукйысьыштіс чигарка помъяс тыра банкаас да перйис сэтысь вит-ӧ-квайт кузьджык пом. Сэсся косяліс стенын ӧшалысь календарысь ӧти лист да гартыштіс «кӧза кок». Биаліс, горша кыскыштіс — пыр и виньдіс дука тшыннас да бура дыр тшӧкъяліс. Бӧрын тай шедіс жӧ лолыс, кутіс азыма шпуткыны ӧшиньӧ дзӧръялігтыр...

Мир туй кузя, туй дор керка ӧшиньясӧ видзӧдалігмоз, шлёпсьӧдіс-муніс абача кодь ён мужик. Сувтыштлас, мӧвпалыштас мыйкӧ ас кежас, да водзӧ бротиктӧ. Шапкатӧм.

— Чӧвлы, да тайӧ жӧ Ликӧ Вась! — ыткӧбтіс-чеччис Ӧльӧш да матыстчис ӧшинь дорас. Курич пӧлӧн мӧдіс вишкыны-кыйӧдны юысь ёртсӧ, кодарӧ сійӧ сетчас. А Вась кежис Сава Ӧгашъясӧ. Ӧльӧш веськодя ышловзис да бӧр шлапкысис-пуксис улӧс вылӧ.

— А-а! Сава Ӧгашыдлысь тӧвнас лым он босьт, непӧштӧ сулея, — шуыштіс аслыс да ӧвтыштіс кинас.

Недыр мысти Вась бара тыдовтчис. Ӧльӧш донъялана видзӧдліс сылӧн нёпмунӧм зепъяс вылӧ да зумыша чӧвтіс:

— Ме тай шулі, мися, Сава Ӧгашад оз чукты нинӧм.

Сэсся Вась кежис Ӧльӧш дорӧ. Коксӧ пыркӧдыштіс чирссьӧм гӧликӧн да чина морт моз котш-котшвӧчис ӧдзӧсӧ.

— Позьӧ? — Вась мыччис ӧдзӧсӧд пач лыс кодь гӧрд лёзь юрсиа юрсӧ.

— Пыр, пыр... Мый нин котшкӧдчан, он ӧд директор дорӧ пыр. Немуйтан сэні.

— Мый нӧ бубуля кодь пукалан, вӧльнӧй светас он петав?

— А мый сэсь корсян? Коді менӧ виччысьӧ?

— Висьӧ юрыд?

— Ой, эн нин шу! Чашкӧдӧ прамӧ! Тӧрыт кыкӧн ӧмӧй квайт «Троясӧ» и гындім? Али кодкӧ пайкысь вӧлі жӧ?

— Он помнит али мый?

— Нинӧм ог. Сё ей богу!

— Но и но, — рочыштіс Вась. — Матрен Миш пыраліс. Тэ стӧкан тыр кисьтін сылы. Сійӧ юис да кутіс бызгыны нинӧм абусӧ. Сэсся тэ сылы ныр-вомас и вуштыштін.

— Дугды, эн вай сӧр! Мыйысь нӧ ме кута нӧйтны Матрен Мишсӧ?

— Эн на шу! Дӧмыштін тай... Сійӧ ӧд тэнӧ удтысьӧн нимтіс.

— Удтысьӧн?! Мый нӧ ме удті? Кодӧс? Кодлы?

— Сійӧ ӧд и эм.

— А мый нӧ пӧ удті? Висьталіс жӧ?

— Быттьӧ пӧ удтӧмыд сійӧс директорлы, скӧт картаысь пӧ гусялӧма ӧтруб мешӧк да вузалӧма сійӧс сулея вылӧ Сава Ӧгашлы.

— Вот гадыд! Ме удті?

— Тэ пӧ... Вот сэсся и ӧзйин. Кыдз тай лӧсыштін ныр-вомас — гырдсермуні. Нюжӧдчис джоджӧ краж моз. Тэ эськӧ чужъявны на заводитлін, да ме куті. Эг лэдз, виан, мися. Тайкӧ и менӧ сэсся тшӧтш пачесайтан.

— А Матрен Мишыс?

— Сійӧ чеччис да сьӧласиг-матькигтыр усйысис-муніс. Грӧзитчис на, сюрлан пӧ мӧдысь, водзӧс босьта.

— Ёна ме сыысь пола да...

Пукалыштісны чӧв. Вась гӧгӧртіс синнас другыслысь керка пытшкӧссӧ. Сэсся друг сылӧн синмыс югзис.

— Ӧльӧш, кӧсъян, ӧні жӧ, вит минут мысти, еджыд сарапана доз вая?

— Эн сӧр. Дыш кывзынысӧ.

— Збыль шуа.

— Мун сэсь. Ме бурджык куйлышта, а то сьӧлӧмӧй чеччӧ дай юрӧй потӧ.

— Но, но, куйлышт. Пӧж пӧкмеллятӧ.

Ӧльӧш нюжӧдчис крӧватьӧ, кунис синсӧ. Ликӧ Вась чеччис, мыйкӧ мошкоритчыштіс да воськовтіс ӧдзӧслань.

— Но, ме муні. Видзӧдлан вот, ог кӧ вай дозтӧ.

Ӧльӧш весиг эз шыась, сӧмын скӧрысь ружӧктіс.

Недыр мысти кыліс кок шы да воссис ӧдзӧс. Паськыда шпынняліг-вашъялігтыр пырис Ликӧ Вась. Водзӧ чургӧдӧм киас дзирдаліс-красуйтчис югыд сулея. Да эз кутшӧмӧскӧ, а «Распутин» водка!

— Кытысь нӧ? Кӧч сіталіс али мый? — звирк чеччис Ӧльӧш да уськӧдчис паныд.

— Места надо знать, — рочыштіс Вась да мыччис дозсӧ ёртыслы.

Ӧльӧш кватитіс да быдӧн окаліс югыд дозсӧ — веськыда этикеткаас серпасалӧм Распутинсӧ. Сэсся пуктіс пызан шӧрас да уськӧдчис корсьны вомӧ сюянтор. Вайис кык лук, сов да нянь кӧрыш. Ликӧ Вась пуксис пызан сайӧ да нюмъялігтыр босьтчис песовтны «Распутинлысь» юрсӧ.

— Пуксьы нин, мый сэн жӧдзан?

— Энлы, тшай пузьӧдам да вӧлись. Пӧсь тшайнас, бура заваритам да, шпунтовка вӧчам. Сідзсӧ дырджык тырмас, — сьылыштіс Ӧльӧш да кутіс клёнӧдчыны-корсьысьны.

— Кытчӧ нӧ пуктыссьӧма, бога мать, некӧн абу! Эн аддзыв?

— Мый эг аддзыв?

— Да тшайниксӧ нӧ... Сылӧма быттьӧ.

А Вась пукалӧ да шпыннялӧ. Кружкаяс нин матыстӧма, лӧсьӧдчӧ кисьтавны.

— Мый нӧ жеръялан сэні? Кӧн тшайникыс?

— А этійӧ нӧ мый? — сольк-сольквӧчис дознас Вась.

— М-мый? — тшӧкмуніс Ӧльӧш. — Да тэ мый? Менсьым тшайникӧс вузалін али мый?

— А тэ чайтін, меным тайӧ прӧста сідз сюри?

— Ныра сволочӧс! Падла! Ӧні жӧ бӧр ну, скӧтина! Кыдз гажыд, а тшайниксӧ бӧр вай!

— Мен нӧ мый? — чеччис Вась да бӧр гартыштіс разьлӧм пробкасӧ. — Ме ӧд тэнӧ жӧ, йӧйӧс, жалиті да сійӧн... Мися, кулан... Но, сідзкӧн...

Вась бергӧдлыштіс дозсӧ киас, сьӧкыда ышловзис, сюйис питшӧгас да воськовтіс пороглань.

Ӧльӧшлы кыськӧ друг вом тырыс дульваыс локтіс. Ньылыштіс сійӧс да кутчысис юрас. А юрыс и збыльысь потіс-висис. Быттьӧ гын нӧшкӧн вачкӧмаӧсь, а пытшкӧсас сімӧм сутугаӧн гирскӧны. Будзгыльтліс плеш пырыс петысь Вась вылӧ да уськӧдчис сы бӧрся. Вась быдӧн повзис. Клоп пӧдлаліс ӧдзӧссӧ да котӧрӧн петіс кильчӧ вылас.

— Да сулавлы, рыжӧй чӧрт! Вай дозсӧ! Матере, тшайникнас и ставнас. Менам кольтан-кипятильник эм. Бакалын зэв жӧ лӧсьыда пузьӧдас тшайтӧ.

— Вот это по-нашему, — шешмуніс Вась да бӧр пырис другыс бӧрся.

— Кисьтав зільджыка, шматьӧй...

Вась кисьталіс кружкаясӧ да босьтіс ӧтисӧ.

— Но, пожъялам тшайниктӧ!

— А-а, — ӧвтыштіс кинас Ӧльӧш. — Ӧтар бокыс лямалыштӧма жӧ нин вӧлі. Матере...

Кык друг чокнитчисны да чӧскыда гулькнитісны-юисны.

— А-ак! Добра! — малыштіс кынӧмсӧ Ликӧ Вась.

— Добра и эм, — содтіс Ӧльӧш да шӧриаліс нянь кӧрышсӧ. — На, закусит, другӧ. Со луксӧ тшӧтш курччы, солас тшукӧдлы да.

— Мыйкӧ тэнад солыд гырысьджык дай курыдджык быттьӧ...

— А... Двӧрысь вайлі... кутшӧмкӧ «лизунеч» пӧ... Гырйын тойи дай олас. Пожнавны кӧ эськӧ, дерт, поснялас на да.

— А, мелёт миянлы... Да вед? Сов вылӧ сьӧм видзны кутам, — ошкыштіс муса другсӧ Ликӧ Вась.

Нямлясьыштісны. Пукалыштісны чӧв. Кыкнанныс кывзыштісны морӧс пытшканыс вина жарыслысь ӧгрӧдлӧм-ворсӧдчӧмсӧ. Первой синъясныс югзисны. Сэсся вирсялыштісны бандзибъясныс. Весиг быттьӧ томмыштісны.

— Но, вай, другӧ, тшынасьыштам, — Вась перйис «Прима» пачка.

— Тэ тай зэв озыр, — меліа нюммуніс Ӧльӧш, пестіс чигаркасӧ да чӧскыда кыскыштіс. — Вот тайӧ друг!

— Друг, дерт, — пушнитіс тшынӧн Ликӧ Вась. Сэсся гач зепсьыс перйис кык «Троя» сулея. Клон пуктіс пызан вылӧ. — Со на нӧшта мый эм!

— Тэ волшебник али мый? — чуймис Ӧльӧш. — Тайӧ кысь нин лои?

— Мый нӧ ме ӧти доз вылӧ али мый сеті Сава Ӧгашлы тэнсьыд тшайниктӧ? Абу ӧд йӧй! Зэв эськӧ скупердяй сійӧ да. Но ме, кыдз шуласны, абу жӧ тюни.

...Бура дыр пукалісны-трайгисны кык друг. Кушӧдз ректісны и «Распутинтӧ», и «Трояястӧ». Кыкнанныс мыйкӧ бызгисны-висьтасисны, но некоднанныс ёртнысӧ эз кывзыны...

Вой шӧр гӧгӧр Ӧльӧш лэптіс юрсӧ пызан вылысь да гӧгӧртіс былялӧм синнас керка пытшкӧссӧ. Полӧмпырысь видзӧдліс другыслӧн пукаланінӧ да весьӧпӧрліс, быттьӧ йиа ва койыштісны мышкас, а сэсся шыбитіс пӧсьӧ. Плешкас ӧшйисны гырысь вабольяс. Ликӧ Вась другыс местаын ыджыд «Троя» сулея сайсянь сы вылӧ шпынняліс-видзӧдіс да няйт бӧж помсӧ няклялігмоз читкырасис сюра-тошка Распутин.