ВОРСАН ТАБЪЯС

Менам ыджыд батьӧ, Мефодий Романович Попов — сиктса ногӧн Рӧман Поди, вӧвлӧма зэв шмонлив мортӧн. Уна вӧлӧм мойдкывъястӧ тӧдӧ. Ас наукаӧн перйылӧма грамота. Мойднысӧ велӧдчылӧма батьыслысь ветліг-мунігъясӧн, гын сапӧг вӧчигъясӧн. Мойдӧма «Дальнӧй вӧр», «Правда да кривда», «Китрӧсть-мудрӧсть» да мукӧд мойдъяс.

Вӧвлӧма империалистическӧй да гражданскӧй война фронтъяс вылын. Некор абу усьлывлӧма шогӧ. Зэв гажа морт вӧлӧма.

Ӧтчыд крам праздник дырйи, Иван лунӧ, чукӧртчасны гӧсьтъяс налӧн керкаӧ. Заводитчас гаж. Босьтчасны ворсны: коді гудӧкӧн няжгӧ, коді пу паньясӧн тотшӧдӧ, коді бедьясӧн котшӧдӧ, а коді и сьылӧ «Шондібан». Зэв мичаа артмӧ.

Ыджыд батьлӧн керка стенас вӧлӧм ӧшалӧны-косьмӧны кӧв вылын тывлы вӧчӧм табъяс, кызь кымын. Видзӧдас-видзӧдас сійӧ табъяс вылад да босьтас киас. Кӧвйӧдыс ӧшӧдас сьыліас да кутас сьылӧм-ворсӧм улас швачӧдны табъяснас воча-воча. Ок и мича артмас! Ёна и гажӧдчасны сэки. Уна частушка сьыласны, кадриль йӧктасны. И быд ворсӧм улӧ батьӧ тшӧтш ворсӧ табъяснас. Зэв ёна кажитчас табйӧн ворсӧмыд, да сэсся тайӧ табъяссӧ абу и пысавлӧмаӧсь тывъясас. Дыр видзӧма да ворслӧма наӧн ыджыд батьӧ. А сэсся тай кытчӧкӧ саймовтчӧмаӧсь, вошӧмаӧсь. Ме эг нин аддзыв.

Гашкӧ, сэсянь и паськаліс, и ӧні на со гажӧдӧны миянӧс сьыліг-ворсігъясӧн. Ёна жӧ челядь радейтӧны швачӧдны-ворсны «Шондібан» улад тайӧ мича ворсан табъяснас.