ӦНИСЬ ДЯДЬ ОРДЫН

Кӧнкӧ татӧні матын, миян Коми муын, дзоляник сиктын овлӧма зэв шань да бур сьӧлӧма пӧльӧ. Сиктсаыс ставныс, гырысь и посни войтырыс, шуӧны вӧлӧм сійӧс Ӧнись дядьӧн. Ӧнись дядь вӧлӧма зэв нин пӧрысь, но крепыд, сирӧд мыр кодь, кыдз шулӧма ачыс пӧльӧ. Сійӧ вӧлӧм зэв мастер морт. Быдторсӧ кужлӧма вӧчны. Пӧчӧяс ыдждӧдлӧмаӧсь сійӧс зарни киа мортӧн. Вӧчас вӧлӧм пуа кӧлуйтӧ, серпасалас быдсяма дивӧ кодь серпаснас, да любӧ киад босьтны. Синтӧ дыр он вермы вештыны тайӧ чача кодь мича да лӧсьыд вӧчӧмторсьыс. Пӧльӧлысь уна вӧчӧмтор ӧні на позьӧ аддзыны коми йӧзлӧн керкаясысь. Тайӧ и печканъяс, чӧрсъяс, и чуман-пестеръяс, и туисъяс, и пельсаяс, и нӧшта на уна мукӧд пӧлӧс сюмӧда-пуа кӧлуй.

А челядь, лов шысӧ дзебӧмӧн, пуксьӧмаӧсь Ӧнись дядь гӧгӧр да кывзӧны сылысь варовитӧмсӧ, мойдӧмсӧ, ӧти кыв оз воштыны, ставсӧ пель гӧгӧрыс гартӧны.

Ме Ӧнись дядь моз жӧ висьтала-мойда челядьлы коми йӧз йылысь легенда сяма мойдъяс, висьтъяс, велӧда ворсны быд пӧлӧс ворсанторнас да сьывны мича коми сьыланкывъяс.