КОЛӦ БУРДЖЫКА ГӦГӦРВОНЫ

19-ӧд номерын «Югыд туйын» вӧлі гижӧма: «Трудгужналог позьӧ деньгаӧн мынтыны».

Кодсюрӧ тайӧ гижӧдсӧ абу лючки гӧгӧрвоӧмаӧсь. Сы йылысь ми ещӧ гижам талун.

Ӧтилаын гижӧма: «Тайӧ налогыс перйыссьӧ сэки, кор крестьяналы эм унджык прӧст пӧраыс».

Кодсюрӧ гӧгӧрвоӧмаӧсь сідз: «Турунла ли, песла ли кӧ пӧ муна — трудгужналог мынтыны менам абу прӧст пӧра».

Тадзи шуны оз ков. Крестьяналӧн ӧд прӧст пӧраыд пӧшти некор абу да. Тані колӧ гӧгӧрвоны: кӧдзигӧн, турун пуктігӧн, нянь чукӧртігӧн. А кор несчассьӧ суас: пӧжар ли, ойдӧм ли, мӧдтор ли, либӧ кутшӧмкӧ ыджыд мог государстволӧн лоӧ, — сэки трудгужналогӧн вермасны уджӧдны весиг и страдна дырйи.

Мӧдлаын шуӧма: «Позьӧ трудгужналог мынтыны деньгаӧн».

Ӧні бара жӧ шуам — позьӧ. Сӧмын колӧ гӧгӧрвоны, сійӧ статьяыс висьталӧ быдӧнлы (став Россиялы) ӧткодя. Кӧнсюрӧ, мукӧд губерняясын, став трудгужналогсӧ мынтӧны деньгаӧн, мукӧдлаын — оз.

Деньгаӧн трудгужналог позьӧ вештыны (мынтыны), кор уджӧдны оз позь: кодлӧн, примернӧ, видз-му абу; кӧні либӧ натуранас некутшӧм уджалантор абу, либӧ мукӧдтор понда (вывті ылӧ колӧ мунны ли, пӧльза кӧ казналы уджсьыс оз ло ли, мый ли, — лючки та йылысь ставсӧ позьӧ тӧдны быд Отдел Трудаын, быд исполкомын).

Сідз жӧ и срокъяс йылысь. Мукӧдлаас, местаяс серти, срокъяс позьӧ вежлавны ичӧтика. Со статьяас гижӧма: «Медводдза срок — 15 март», а Сыктывдінкарын (Кӧдзвыльскӧй вӧлӧсьтын) — 1 март.

Сійӧ статьяыс (19-ӧд номерын) висьталӧ сӧмын: Сӧветскӧй власьт сетіс выль кокньӧд трудгужналог йылысь.

Оз ков мӧд ногӧн, лёк ногӧн гӧгӧрвоны.

В.