УБЫТКА ОЗ ЛО

Лунысь лунӧ ми газетын трубитам: ньӧбалӧй зӧлӧтӧй выигрышнӧй заём! Зэв нин унаысь гижлім, кутшӧм пӧльза сійӧ сетӧ быдӧнлы.

Вит чӧлкӧвӧя билет (облигация) вылӧ вермас усьны сё сюрс (100.000) чӧлкӧвӧй, либӧ ветымын сюрс (50.000), либӧ этшаджык — медыджыд воӧмыс (выигрыш) сё сюрс чӧлкӧвӧй, медічӧтыс — кызь чӧлкӧвӧй зӧлӧтаӧн. Ставыс — 13169 воӧм быд лотерея (розыгрыш) вылын (розыгрышыс таво лоӧ 1-й майын да 1-й сентябрын; мӧд восянь 1927‐ӧд воӧдз — 1-й январын да 1-й юльын).

Тӧлысь мысти, 1-й майын, Мӧскуаын лоӧ первой лотерея.

Тайӧ лотерея вылас зэв выгӧднӧ быдӧнлы, кодлӧн эм выигрышнӧй билет, со мый понда: государство эз на лэдз став билетсӧ (став билетыс кызь миллион), ӧнӧдз петӧма сӧмын кӧкъямыс миллион; тайӧ 8 миллион билетыс ворсӧны (участвуют) став выигрыш вылас. Та серти позьӧ сэсся гӧгӧрвоны, кутшӧма содӧ частитӧм быдӧнлы: билетыс этша, воӧмыс уна.

Коді эз на удит ньӧбны билетсӧ — колӧ тэрмасьны. Билетъяс вузассьӧны: Финансӧвӧй Отделъясын, кооперативъясын, пошта вылын.

Ӧні лыддям, уна-ӧ вермас усьны ӧти билет вылӧ деньга. Вит чӧлкӧвӧя билет сулалӧ сё комын чӧлкӧвӧй (миллион), медічӧт выигрышыс кӧ усьӧ (20 чӧлкӧвӧя) — воас витсё кызь миллион шайт, медыджыдыс кӧ усьӧ (100.000 чӧлкӧвӧя) — воас кык триллион да квайтсё миллиард шайт.

Со кутшӧм ыджыд пӧльза!

Сідзжӧ лоӧ пӧльза и асланым государстволы: ёнмас деньга дон, быдтор лоӧ донтӧмджык, да-й пабрик-заводъяслы лоӧ кокньыдджык.

Сэсся оз кӧ усь таво выигрышыс, вермас усьны локтан воясӧ — билетыс ассьыс донсӧ некор оз вошты. Некутшӧм выигрыш кӧ оз усь — быд морт вермас бӧр сетны казналы ассьыс билетсӧ да бӧр босьтны деньга вит чӧлкӧвӧй зӧлӧтаӧн; таысь ӧприч, билетыс вайӧ ещӧ на барыш: 30 кӧп. быд во (зӧлӧтаӧн жӧ).

Та серти тыдалӧ: некутшӧм ногӧн билет кутысь морт оз ло убыткаын.

В.