ӦТУВЪЯ КӦЙДЫС ЙӦРТӦД

«Ӧтувтчӧмын — вын».

Миян Коми муын бурджыка чужӧ татчӧс воӧм нянь кӧйдыс (ас кӧйдыс). Ылі муысь (лунвылысь) вайӧм кӧйдысысь тані озджык няньыд артмы — климатыс оз лӧсяв. Бокӧвӧй кӧйдысыд дырджык быдмӧ (унджык колӧ пӧра), дыр оз шептав, оз розъяв да унаысь оз вермы и воныс — миянын гожӧмыд дженьыд да.

Сы понда колӧ видзны пыр татчӧс кӧйдыс. Мед крестьяна некор эз орны кӧйдысысь, колӧ лӧсьӧдны запаснӧй магазея ас кӧйдыслы. (Запасный местный семенной фонд).

Областнӧй Земельнӧй Управленньӧлӧн сетӧма нин вӧлӧсьтъясӧ инструкцияяс (гижӧдъяс), кыдзи колӧ лӧсьӧдны сэтшӧм кӧйдыс запасъяссӧ, кыдзи колӧ сетавны йӧзлы сэтысь кӧйдыссӧ.

Сӧмын вӧлӧсьтъясас омӧля на та вылӧ видзӧдӧны, пыр на миян крестьяна костын эм торйӧн-торйӧн олӧм, некутшӧм ӧтувтчӧм-перевод абу. Сійӧн и омӧля ми олам.

Видзӧдлам кӧ бӧрвылӧ (воддза тшыгъялан вояс вылӧ — 1918−19 вояс), казялам, кутшӧм сьӧкыд вӧлі сэки.

Кутшӧмкӧ кӧ причча суас (шер жугӧдас ли, кынмас ли, косьмас ли кӧ няньыд) — сэки ставыс эштас. Мыйӧн кӧдзан мутӧ?

Быдӧнлы нин колӧ важ олӧмсьыс гӧгӧрвоны: ӧткӧн-ӧткӧн сэтшӧм дырйи зэв сьӧкыд.

А запаснӧй кӧйдыс йӧртӧдыд кӧ эм — абуджык и приччаыд страшнӧ.

Кывзӧй, коми крестьяна, да регыдджык тадзи лӧсьӧдӧй, аслыныд жӧ бур вылӧ!

М-л.