МИЧА Ю

Сэтшӧм ю эм, шусьӧ Виль,
Ок и варов, ок и зіль.
Ок и югыд, ок и сӧдз,
Нуӧ васӧ Эжваӧдз.
Тані омлаг, сэні йир,
Кӧні олӧ сын и сир,
Кельчи, гурина и мык,
Да и ёкыш, коді тшыг.
Но а сэн, кӧн лыа кӧдж,
Эм и мойлӧн керка тшӧтш.
Олӧ-вылӧ смоль сьӧд мой,
Пипу гуджгӧ лун и вой.
Шлывгӧ-тюрӧ визув Виль,
Кӧні вӧрыс тшем и тіль.
Кӧні яг, и кӧні рас,
Кӧні менам рӧдвуж пас,
Кӧні, синтӧ кыдз кӧть тіль,
Сымда мичлун. Тайӧ — Виль!