ЛЮКАСЬЫСЬЯС

Люкасьысь, асныра, сюр пӧла меж,
Вӧтлы кӧть, туй шӧрысь бокӧ оз кеж.
Сэтшӧм нин быдмӧма люкасьысь лов,
Зургас кӧ сюр пӧвнас, уна оз ков.

Талун со пӧрлӧдліс потшӧс бурпӧт,
Кысь тадзсӧ велаліс, некод оз тӧд.
Гашкӧ нӧ, Колялысь босьтіс урок?
Сійӧ ӧд люкасьлӧ тшӧтш уна ног.

Мегарӧй кодьлӧн жӧ Колялӧн плеш,
Стынӧ кӧть стенӧ зургас, кыдз меж.
Усьӧма сылы татшӧм нин шуд:
Великлӧн тормозыс некор оз кут.