КЫВБУРЪЯС-КЛЮЧЬЯС ДА ВИСЬТЪЯС-ЁЛЬЯС

70 во петӧ районнӧй газет, и тайӧ кадколастнас сэні йӧзӧдлӧм кывбур-висьтъясысь эськӧ позис лэдзны 70 жӧ торъя небӧг. Сы мында гижысьыс, сы мында туяна гижӧдыс. Матӧ 500 лист бок артмӧдісны поэзияӧн да прозаӧн йиджтысьӧм уджъяс. Торйӧн нин лышкыда сетліс литераторъяслы йӧзӧдчан места редактор Н. Т. Пунегов, кодлӧн зільӧмӧн и котыртчис «Эжва» клуб. В. Е. Напалков, В. В. Уляшев, В. Г. Лодыгин водзӧ сӧвмӧдісны творческӧй традицияяссӧ, отсалісны бӧрйыны туй уна том поэтлы. Ӧні газет бердын уджалӧ республикаысь писательяс союзлӧн быдса ячейка. Эдуард Тимушев, Александр Шебырев корсьӧны кывбур-висьтъясыслы темаяс журналисталігӧн; Алёна Ельцова, студентка вель тшӧкыда гижӧ Сыктывкарсянь; Алёна Мальцева, том мам, Помӧсдінсянь. Виктория Карманова, Мария Игушева, Галина Ахмедова, Алексей Корецкий, Татьяна Карманова сідзжӧ зэв топыд йитӧд кутӧны газет лэдзысьяскӧд. Районкаын йӧзӧдчӧм бӧрын ӧткымын том гижысьяс писькӧдчисны республиканскӧй изданиеясӧ, лэдзисны весиг асшӧр книгаяс.

Ышнясьтӧг позьӧ шуны, мый «Эжва» лист боктӧг «Парма гор» эськӧ вӧлі гажтӧмджык. Мед эськӧ и водзӧ сійӧ мичмӧдӧ газетлысь чужӧмбансӧ, мед и водзӧ быдтас творческӧй сямлуна том йӧзӧс. Кыдзи Эжва-матушка усьӧ паськыд Двинаӧ да сэсся сӧльнитчӧ помтӧм-дортӧм Вой саридзкӧд, сідзжӧ «Эжва» клуб кутас вынсьӧдны-озырмӧдны ставнас коми литературасӧ.