ИЧӦТТОРСЯНЬ ЫДЖЫД ЧАССЬӦ

Воыс сера джодждӧра кодь. Видзӧдан да, водзад югыд рӧм, а сылань воськовтан — кыӧминыс быздалӧма, няйтӧн йиджӧма. Коми аньяс джодждӧраястӧ артавлісны отъясӧн, бердъясӧн. И дас кыкнан отыс татшӧм: кытчӧкӧ кокни, кыпыд сьӧлӧмӧн сувтсьыліс, а кӧнкӧ и крукасьлі-конъясьлі. Сӧмын ас вӧр керкаын коллялӧм лышкыд арыс бурмӧдіс лолӧс. Сы кузя войяснад мыйтакӧ сюрӧс и воліс юрӧ выль гижӧдъяс панӧм вылӧ. Темаыс ки пыдӧс вылын быттьӧ, а босьтчынысӧ ни ӧтарсянь, ни мӧдарсянь оз артмы. Ӧти пӧрйӧ уджышті пусьысьӧн вӧрын выль ногӧн пӧрӧдчысьяс дорын. Кык тӧлысь мысти муні — сьӧлӧм эз лэпты, ӧд куб да руб бӧрся вӧтлысьысьяс ытшкӧмӧн ытшкӧны менсьым парма-ягӧс, а найӧс ме жӧ и верда. Тайӧ кадколастыс ёна вӧрзьӧдіс-дойдіс. Ӧні на пельын вундалан-тшытшлан пуяслӧн ымзӧм-бӧрдӧмыс.

Сэки жӧ и воис мӧвп видлыны лӧсьӧдны мойд сямаӧс, ӧнія кадсяӧс, мед кӧть кыдзкӧ гӧгӧрвоанаджыка вайӧдны аддзывлӧмторсӧ талунъя челядьӧдз. Панасыс: чужӧны коми вӧрын кык ичӧтик робот-машина — Хордик да Фордик, а наысь сэсся быдмӧны повзьӧдчысь гундыръяс, кодъяслы веськодь миян вӧр-ваыд. Шуны кӧ, быд пӧрйӧ, кор зіля корсьны кутшӧмкӧ дзугйысь петан туй, век медводз кутчыся челядькӧд, челядьдыркӧд йитчӧм серпасъясӧ. На пыр и гӧгӧрвоа ӧнія олӧмсӧ. А ичӧт войтыр нинӧм оз дзебны. Налӧн асланыс видзӧдлас, и дас пӧв вежӧраджык верстьӧ мортысь.

А мый сины АС йӧзлы? Быдӧнлы, кодлы позьӧ эскыны, завидьтыны, вежавидзны, сиа:

Мед лёк кӧ лоӧ — тэ эн кор,

Мед кусыньтчан, а кут на асьтӧ.

А сьӧкыд либӧ дзескыд кор,

Тэ ассьыд челядьдыртӧ казьтыв

Да тӧд, мый водзӧ вылӧ дась тэ

Век лоны челядьӧн, кӧть дзор.

Ӧд ичӧтторсянь ыджыд чассьӧ.