ЭМ КӦ СЬӦЛӦМАД ЕНБИ
Мый дыра петӧ Кулӧмдін районса газет, сы дыра жӧ и велӧдчӧ редакция бердын том гижысь котыр. И абу дивӧ, ӧд Эжва йывса кызвын сиктын да посёлокын вӧліны и эмӧсь енбиа гижысь йӧз. Буретш районкасянь воськовтісны ыджыд литератураӧ вель уна поэт да прозаик, налӧн нимъясыс важӧн тӧдсаӧсь. Зумыд туй вылӧ сувтісны В. Е. Напалков, В. И. Уляшев, А. М. Лужиков, А. В. Ульянов, Н. А. Тюрнин, А. В. Ельцова. На пиысь нёльыс пырӧны Россияса гижысь котырӧ.
«Эжва» литкотыр босьтчыліс Н. Т. Пунеговлӧн редакторалан кадӧ. Но торйӧн унаӧн пырӧдчисны гижан уджӧ сэк, кор газетӧн юраліс В. Г. Лодыгин. Сылӧн водзмӧстчӧмӧн «Эжва» ӧтувтіс енбиа гырысьӧс и посниӧс. Сы дырйи жӧ локтісны газетӧ Э. Тимушев, И. Тарабукин, А. Шебырев, В. Бабин да мукӧд. Миян ставнымлӧн нин эм асшӧр небӧгъяс. А Эдуард Тимушев дзик на неважӧн лэдзис батьыслы, А. С. Тимушевлы, зэв аслыспӧлӧс гижысьлы сиӧм сборник, шусьӧ сійӧ «Помавтӧм сьыланкыв». Алексей Степанович районса газетын жӧ уджавліс.
Дерт, эз ставныс лоны гырысь гижысьясӧн, кодсюрӧ мунісны нин и олӧмсьыс, но Лодыгинӧн панӧм уджыс эз кус. Кадысь кадӧ Кулӧмдінын чукӧртлӧны том войтырлы семинаръяс, корлывлӧны найӧс и Сыктывкарӧ. Вель унаӧн гожӧмнас велӧдчӧны творчество университетын. «Эжвасаяс» топыда йитчисны школаясса коми кыв велӧдысьяскӧд. Пожӧгысь В. И. Шомысов да Е. А. Игнатова, Немдінысь Н. М. Гуляева, Мысысь Л. Л. Паршукова оз сӧмын ышӧдны-кыскыны томуловӧс гижан уджӧ, но и асьныс ёна йӧзӧдчӧны — кодкӧ «Парма горын», кодкӧ — «Коми муын», кодкӧ — «Войвыв кодзулын».
«Эжвасаяс» тшӧкыда волывлӧны школаясӧ, нуӧдӧны восьса урокъяс, литературнӧй аддзысьлӧмъяс, козьналӧны ассьыныс небӧгъяс, донъялӧны челядьлысь выль гижӧдъяс. Тайӧ ышӧдӧм-велӧдӧмыс оз коль казявтӧг: быд тӧлысь петысь «Эжва» йӧрышын школьникъяслӧн висьт-кывбурыс медуна. Сэсся налӧн гижӧдъясыс инасьӧны республикаса газет-журналӧ, ӧтувъя небӧгъясӧ. Сідз, «Аняби» сборникын (дасьтіс В. Г. Лодыгин) 14 верстьӧ гижыськӧд петкӧдчисны и томулов: Алексей Корецкий да Александра Паршукова. А Василий Григорьевичӧн жӧ дасьтӧм небӧгын, коді во-мӧд нин куйлӧ издательствоын, чукӧрмис 60 сайӧ автор! Тайӧ лоӧ Кулӧмдін районса литераторъяслӧн аслыссикас антология. Жаль, мый сборниксӧ, тыдалӧ, дыр на оз аддзы лыддьысьысь — абу пӧ сьӧмыс издательстволӧн. А озыр дядьӧ-«понсоръястӧ» Эжва йылад сьӧкыд корсьны.
Сьӧм абутӧмыд ёна конъялӧ оз сӧмын томсӧ, но и нималанаджыксӧ. Автор тільсяс-мырсяс, а книга петӧмсӧ лоӧ виччысьны во вит-квайт, гашкӧ и дырджык. Дерт, сэсся киясыд усясны. Тырвыйӧ дась небӧг лоӧ куйлӧдны пызан йӧрын. Эз кӧ вӧвны «Коми му» газет, «Би кинь» да «Войвыв кодзув» журналъяс, кытчӧ эськӧ и шыасисны сӧвмысь-быдмысь авторъяс? И буретш тайӧ изданиеяссӧ колӧ аттьӧавны, мый сетісны туй йӧзӧдчыны-паськӧдчыны Анастасия Шомысовалы, Анастасия Дёминалы, Наталья Дёминалы, Татьяна Кармановалы, Алексей Уляшевлы, Иван Ногиевлы, Алёна Мальцевалы да мукӧдлы.
Кор Кулӧмдінӧ волӧны карса гижысьяс, пыр пасйӧны, мый Тима Веньлӧн му вылын коми кыв да литература дорӧ муслун, сійӧс сӧвмӧдан удж некор оз кус. Чайтсьӧ, тадзи и лоӧ. Ӧд олӧмыс мунӧ водзӧ, и быд во зумыд-ён пуяскӧд орччӧн кыпӧдӧны юрнысӧ том петасъяс.
