ПУКСЯС ВЫЛЬ АСЫВ

Пузчужӧм кага моз синъяссӧ тільӧ виж тӧлысь,
Чискӧны кодзувъяс ваймысь нин ӧгыръяс моз.
Качӧма-сылӧма руӧн дзик ставыс, мый тӧрытсӧ вӧлі,
Кывтӧма шорӧн да ёльӧн да юӧн, и бӧрсӧ оз кос.

Мортыд веж му вылас муртса и олыштны волӧ,
Дырджык, дерт, кӧсйӧ, но кыдзи на видзӧдлас Ен.
Сылы ӧд медмуса, медся бур войтыр жӧ колӧ,
Натӧгыс гажтӧмтчӧ, тыдалӧ, ёна жӧ енэжас сэн.

Пуксяс выль асыв да, кодзувъяс кусасны дзикӧдз,
Мунасны йӧз, сэк кор овнысӧ ыззьӧ на выть ^Выть — аппетит, азымлун, тані — овны ёна кӧсйӧм./^.
Ставсӧ, мый арталім, вӧчны ог слӧймӧдчӧй ми кӧ,
Пӧртасны олӧмӧ выльысьсӧ чужысьяс быть.