ПОМСЯ МЫЙКӦ КОЛӦ, КОЛӦ...

Ачым эськӧ абу чина,
Но эм дача и машина,
Челядь орччӧн, гӧтыр дінын,
Грӧшла зептӧ тіран кинам
Водзті моз ог пыр.

Суйӧр сайӧ, саридз дорӧ
Ветла, сьӧлӧм кодыр корӧ,
Сӧмын мыйлакӧ, сё морӧ,
Менӧ вуджысь висьӧм дорӧ,
Майшася нин дыр.

Тайӧ азым гуся дойыс
Лунтыр, войбыд йирӧ-сёйӧ:
Заптысьӧмӧн кадӧс лоя,
Но ог сьӧмӧс весяс кояв —
Банк — бур видзанін.

Помся мыйкӧ колӧ, колӧ!
Горшӧс тыртӧмӧн и ола.
Кушӧн гортӧ ог и волы,
Йӧзлӧн удзӧдӧмысь пола,
Ӧзйӧ завидь син.

И ӧд абу выльтор тӧдны,
Татшӧмыс мый абу ӧтнам,
Коді лоӧ колысь рӧднас,
Коді аддзӧ весиг вӧтнас
Озырлуна рай.

Гӧгӧрвоим ставным миыс:
Мортлӧн аслань кусынь киыс,
Медым куртны, куртны сійӧн,
Вӧйны шылльӧ-мылльӧ пиын,
Жмоттӧ он нин чишкав биын,
И он веж нин тай.