ПАЛЯЛӦМ

Бара лоӧ вежа ванас мыссьыны,
Вайлі тай Крещенньӧ лунӧ вичкоысь.
Сӧмын шогъяс-дойяс бӧрсянь кыссьӧны,
Помся тӧждъяс-могъяс лолӧс личкӧны.

Пожъяся да, грека жырйӧс резъя и,
Буснас-ёгнас гӧгӧр сэті тырӧма.
Морӧс кудйӧ весиг черань везъяліс,
Тышкас-мышкас эськӧ олі дыр-ӧ ме?

Сэксянь, гашкӧ, тэкӧд кодыр торъялім?
Пакталіс да ваймис пӧся радейтчӧм.
Дзик став йитӧд ӧта-мӧдкӧд оръялім,
А ӧд водзӧ тӧлкас-бурас надейтчим.

Ме бӧрын тэ кымынкӧд на шепасин,
Чайтін, вӧльнӧй олӧм ылӧдз нимӧдас.
Шыбласин тэ наӧн, кыдзи кепысьӧн,
Но ӧд коркӧ тайӧ аслыд имитас.

Вежа ванас кевмысьӧмӧн мысся да,
Сэки выль пӧв чужа-ловзя, эска ме.
Нитшсялӧм нин лолӧс бара ыззьӧда —
Ас пӧртъяд пыр пусиг сійӧ дзескаммӧ.