ШАТИН ДА ГУДӦК

Эдуард Тимушевлӧн паметьлы.

Ми тэкӧд вӧлім вокъяс кодьӧн,
Эг этша панялӧй пуд сов,
Пыр мунім-рӧдтім ӧти доддьын
И чайтім-эским: сьыв да ов!

Но эзджык артмы ӧтув сьылӧм,
И дзугсис тэнад бӧръя глас,
Кӧть кӧсйин, ылӧдз медым кылін,
Мед колин йӧз сьӧлӧмӧ пас.

Кор Кадам тыын вугыршатьӧн
Сьӧд ёкыш лэпталім нитш пыр,
Тэ шулін: тадз жӧ кыйсис батьӧ,
Но Ен эз сет тай овны дыр.

И тэнад дженьыд лои нэмыд,
Кӧть слӧймин вӧчны уна бур.
Мен гажтӧм, синъяс водзын пемыд,
И ӧткӧн тӧлка туй оз сюр.

Кор вола Кулӧм юным дорӧ,
Яр бипур быттьӧ аддза ме.
И кылӧ трачкӧм шы рытсёрӧдз,
Би гӧгӧр: ме, Лодыгин, тэ.

Ми табъяс вунӧдім да варгам
И ырскам вӧрса крепыд тшай.
Лодыгин Вась выль кывбур таргӧ,
Ми сы бӧрся, ассьыным пай.

Дерт, Габовоса гижысь явӧ
Оз кыпӧдчы, оз ошйысь сэк,
Мый сылӧн артмӧджык на ставыс,
Ми вокыс велӧдчам на век.

Тэ сэсся гудӧк перъян быттьӧ
Машина бӧжысь, коді тан.
И кывбуръяс он сэсся лыддьы,
А войбыд нязган «Шондібан».