КЫЙСЬЫСЬ

Тусяпуысь ньӧввуж вӧча,
Ме ӧд кыйсьысь, лыйся стӧча.
Ог и ошйысь: весиг инма
Горсъяс дзебсьӧм урлы синмас.

Су потшӧс дорӧдз кӧ кайла,
Прӧмыс вексӧ ноптыр вайла.
Ручтӧ, тулантӧ да низьтӧ
Карта сайысь на и сизьда.

Ковмас: ош вылӧ на пета
Дзоля вӧрӧ — олӧ сэтӧн.
Гуыс тонӧ — ыб чурк вылын,
Ӧти ньӧв и тырмас сылы.

Бара ачымӧс ог ошкы:
Здук — и чергӧдчӧма ошкыд.
Аслым сизим ар на кӧть и,
Татшӧм удалыс ме — ӧти!

Сӧмын... ньӧввуж зэвтны колӧ,
Отсалыштны кодкӧ волӧй.
Бадьлӧн вужйысь тусяпусӧ
Ӧтнам некыдз тай ог кусыньт.