НАРТ

Коді вӧля тӧдлӧ,
Сыысь оз и пӧтлы,
Коді нартӧ пырӧ,
Вӧля сылӧн бырӧ.
	Мыйлакӧ тай гежӧд
	Вӧля туйлань кежӧ.
	Нарт улынӧсь ставӧн.
	Гусьӧн да и явӧ,
	Кывсӧ сӧмын ас ног
	Гӧгӧрвоӧдасны.
	Вуджӧрысь моз, но ӧд
	Збыльторсьыд он пышйы.
	Увтыртӧмыд овлӧ
	Сё сюрс пиня-гыжъя.
Медвойдӧр кӧть казьтышт,
Нартитӧ кыдз власьтыд.
Государство йӧзлы
Бурсӧ эз на вӧзйыв.
Воас тужа-нужа —
Бергав, кыдзи кужан.
Тӧдӧ сӧмын асьсӧ
Вылын юра власьтыд.
	Либӧ босьтам вичко.
	Сійӧ ловъяс личкӧ:
	Ентӧг абу олӧм,
	Поплы копыр колӧ.
Да и весиг гортын
Абу мезда мортыд —
Айыс иньсӧ бертӧ,
Нартитӧ жӧ, дерт, ӧд.
	Бать-мамыслысь кывсӧ
	Ныв-пилы быть кывзы.
	Тыдалӧ мед быттьӧ
	Пуктӧны мый пыдди.
Нарт улын му, вӧр-ва,
Нарт улын зверь-пемӧс.
Морт оз воськовт бӧрвыв —
Тадзи вӧлі нэмыс.
	Кодӧскӧ да быдӧн
	Нартитӧ ас ногыс:
	Ӧти — гусьӧн, шытӧг,
	Мӧд жӧ — скӧрысь, лёкысь.
Сё сюрс пиня нартыс
Дзик став Му шар гартіс,
Некыдз сыысь мынны,
Сэтшӧм сылӧн выныс.
	Мый нӧ эськӧ мездас
	Тайӧ сьӧкыд крестысь?
	Кыдзи эськӧ чинас
	Нартлӧн ыджыд чиныс? —
	Мӧвпаламӧй тадзи,
	Петан туй ог аддзӧй.
	Уна нэм на ковмас
	Мездлунтӧгыс овны.
	Сэтшӧм рӧкыс миян —
	Вӧля — дорӧм киын.