КОРСЯНТОР

Изьва вожын, Изьва вожын
Менам быттьӧ мыйкӧ воши,
Корся воштӧмторсӧ чожа,
Сӧмын оз тай сюр.

Изьватаслысь кыввор кыла,
Лӧсьыд лоӧ сьӧлӧм вылын,
А кор ижемкаыд сьылӧ,
Кольмӧ весиг юр.

Мада, авко, бурня, вачег —
Тані сёрнитӧны тадзи,
Но век ӧти кывтӧ аддзӧ
Комиысь быд морт.

Тані, кӧні лӧз Печора
Туӧ-ойдӧ юӧн-шорӧн,
Тэныд сюрас водз кӧть сёрӧн
Мусук либӧ ёрт.

Изьва вожын, тундра сывйын,
Абуӧсь кӧн сусъяс, ньывъяс,
Аслас этшӧн, аслас кывйӧн
Войтыр абу нор.

Тані, ыркыд муыс вылын,
Сьӧлӧмнад и ловнад сьылан,
Оз ков мунны ылӧ-ылӧ —
Аддзан воштӧмтор.